Katër persona kanë përfunduar në spital pas një sulmi me mjet prerës në qendër të Londrës pasditen e së mërkurës. Ngjarja ndodhi në Edel Street, pranë zonës Covent Garden, rreth orës 12:30 me orën lokale, ku shërbimet e emergjencës u njoftuan për një incident të dhunshëm.

Sipas Shërbimit të Ambulancës së Londrës, ekipet mjekësore u dhanë ndihmën e parë katër personave të plagosur në vendngjarje, përpara se t’i transportonin në një qendër të specializuar për trajtimin e traumave.

Të plagosurit janë katër burra të moshave 34, 39, 42 dhe 52 vjeç. Policia Metropolitane e Londrës bëri të ditur se ka arrestuar një grua 47-vjeçare në lidhje me sulmin. Sipas autoriteteve, hetimi ndodhet ende në fazat fillestare, por dyshohet se ngjarja mund të jetë e lidhur me probleme të shëndetit mendor.

Oficerët e policisë që mbërritën në vendngjarje sekuestruan edhe një palë gërshërë, të cilat dyshohet se janë përdorur gjatë sulmit. Hetimet vijojnë për të zbardhur rrethanat e plota të ngjarjes.