Presidentja e Komisionit Europian, Ursula von der Leyen, ka mbërritur në Kryeministri, ku është pritur nga kreu i qeverisë, Edi Rama.

Mbërritja e Von der Leyen zhvillohet në një atmosferë të tensionuar jashtë godinës, ku një grup qytetarësh dhe aktivistësh po protestojnë kundër qeverisë.

Ndërkohë, jashtë perimetrit të sigurisë vijojnë thirrjet e protestuesve, të cilët më herët janë përplasur verbalisht me efektivët e Policisë pasi nuk janë lejuar të afrohen pranë Kryeministrisë.

Në zonë janë dislokuar forca të shumta policie dhe janë vendosur barriera metalike, ndërsa protestuesit kanë lëshuar thirrje kundër kryeministrit Rama dhe kanë kërkuar që mesazhi i tyre të dëgjohet edhe nga Von der Leyen.

Vizita e presidentes së Komisionit Europian në Tiranë është pjesë e turit të saj në Ballkanin Perëndimor.