Kosova U21 ka shënuar fitoren e dytë rresht në kualifikimet për Kampionatin Evropian 2027.

Dardanët e rinj triumfuan 2:1 ndaj Qipros, të mërkurën mbrëma në stadiumin “Fadil Vokrri” në Prishtinë, duke përmbysur rezultatin në pjesën e dytë.

Qipro kaloi në epërsi në minutën e 52-të me Savvas Kontopoulos, por Kosova reagoi fuqishëm dhe brenda shtatë minutash e përmbysi rezultatin.

Hekuran Berisha e barazoi rezultatin në minutën e 69-të nga pika e bardhë, derisa në minutën e 76-të Lirim Jashari realizoi për 2:1, pas asistimit të Berishës.

Në fund, Qipro mbeti me nëntë futbollistë në fushë, pasi Georgios Angelopoulos u përjashtua në minutën e 78-të, ndërsa Zacharias Ioannides në minutën e 85-të.

Kjo ishte ndeshja e parafundit e Kosovës në Grupin A kualifikues për “Euro 2027”. Pas nëntë ndeshjeve, Kosova ka grumbulluar 14 pikë dhe renditet në vendin e katërt. Finlanda kryeson grupin me 22 pikë, një më shumë se Spanja, e cila ka një ndeshje më pak të zhvilluar. Rumania është në vendin e tretë me 16 pikë, ndërsa Qiproja ka tri dhe San Marino nuk ka pikë.

Kosova nuk i ka më mundësitë për kualifikim, por në ndeshjen e fundit do të synojë ta mbyllë këtë cikël me fitore dhe të luftojë për pozitën e tretë në grup.

Dardanët U21 ndeshjen e fundit e zhvillojnë më 6 tetor ndaj Finlandës, në ora 19:00.