Një nga detajet që nuk bie menjëherë në sy te Egnatia e këtij sezoni është disiplina në fushë. Pas pesë javëve të para, kampionët kanë marrë vetëm nëntë kartonë të verdhë dhe ende nuk kanë regjistruar asnjë karton të kuq. Shifrat marrin më shumë kuptim kur krahasohen me të njëjtën periudhë të sezonit të kaluar, kur Egnatia kishte marrë 19 të verdhë dhe tre të kuq.
Diferenca është e ndjeshme, nga 19 në 9 kartonë të verdhë dhe nga tre të kuq në asnjë. Një tregues që fl et për një skuadër që po e menaxhon ndryshe aspektin e dueleve dhe kontakteve fi zike. Kjo nuk do të thotë se rrogozhinasit kanë humbur agresivitetin apo intensitetin në lojë, por se ndërhyrjet po shoqërohen me më shumë kontroll dhe zgjedhje të momentit të duhur.
MENAXHIMI – Një karton nuk vjen gjithmonë si pasojë e një ndërhyrjeje të domosdoshme. Shpesh ai mund të jetë rezultat i një reagimi të vonuar, një ndërhyrjeje të panevojshme apo një pozicionimi që e detyron lojtarin të ndërhyjë në limit. Pikërisht në këto detaje duket se Egnatia ka bërë ndryshimin. Trajneri Nevil Dede kërkon një skuadër të fortë në duele, por njëkohësisht të aftë për t’i menaxhuar situatat pa marrë rreziqe të panevojshme.
Në një kampionat të gjatë, kjo ka rëndësi të veçantë, pasi çdo karton mund të ndikojë në formacionin e ndeshjes së ardhshme, ndërsa një karton i kuq mund të ndryshojë tërësisht rrjedhën e një sfi de. Deri tani, Egnatia nuk ka pasur probleme të tilla. Asnjë lojtar nuk është ndëshkuar me të kuq dhe numri i të verdhëve është përgjysmuar në raport me të njëjtën periudhë të sezonit të kaluar. Për Deden, kjo nënkupton më shumë alternativa dhe mundësi për ta menaxhuar grupin në varësi të formës, kundërshtarit dhe kërkesave taktike.
EGNATIA “E RE” – Në një periudhë kur ndeshjet vijnë njëra pas tjetrës, të kesh sa më shumë lojtarë të gatshëm është një avantazh i rëndësishëm. Pezullimet e panevojshme mund të prishin planet e trajnerit dhe të sjellin ndryshime që nuk lidhen me dëmtimet apo formën e futbollistëve. Për këtë arsye, shifrat e pesë javëve të para janë edhe një tregues i mënyrës se si po ndërtohet Egnatia e këtij sezoni. Nëntë kartonë të verdhë dhe zero të kuq tregojnë një skuadër më të kontrolluar në aspektin disiplinor. Nëse kjo tendencë vijon, atëherë nuk do të jetë më thjesht një statistikë e fi llimit të sezonit, por një element i konsoliduar i mënyrës së lojës së kampionëve. Egnatia po kërkon të jetë agresive aty ku duhet, por edhe e matur kur situata e kërkon. Dhe pas pesë javësh, ky është një nga ndryshimet më të dukshme në krahasim me nisjen e sezonit të kaluar.
