Qyteti ukrainas i Oleskit, rreth 9 kilometra nga Khersoni, ndodhet në prag të një katastrofe humanitare, ndërsa banorët e mbetur në zonë po përballen me mungesa të rënda të ushqimit, ujit të pijshëm, ilaçeve dhe energjisë elektrike. Qyteti ka qenë nën pushtimin rus pothuajse që nga fillimi i pushtimit të plotë të Ukrainës në vitin 2022. Situata është përkeqësuar ndjeshëm pas shkatërrimit të hidrocentralit të Kakhovkës në vitin 2023, që shkaktoi përmbytje të mëdha dhe dëme të konsiderueshme në zonën e Khersonit.

Sipas autoriteteve ukrainase dhe dëshmive të banorëve, furnizimet ushqimore janë drejt fundit, ndërsa ekipet ukrainase po përpiqen të dërgojnë ushqime në zonën e pushtuar përmes dronëve. Një banor i Oleskit i ka dërguar administratës ukrainase, e zhvendosur në një zonë tjetër, një mesazh ku përshkruan ushqimet që i kanë mbetur: një panxhar, pesë patate, një qepë, një kungulleshkë, një domate dhe pak elb. “Po përgatisim borshin tonë të fundit”, shkroi ai, ndërsa një tjetër banor tha: “Ne hamë një herë në ditë”. “Patjetër që do të vdesim këtë vjeshtë. Unë tashmë po vdes, po dobësohem çdo ditë”, thuhet në një tjetër mesazh.

Oleski dikur kishte rreth 24 mijë banorë, por lufta dhe pushtimi kanë shkaktuar një largim masiv të popullsisë. Sipas vullnetarëve ukrainas, deri në fund të shtatorit në qytet kishin mbetur më pak se 2 mijë persona, mes tyre rreth 50 fëmijë. Vullnetarja ukrainase Iryna-Ester Vrataryeva, e cila është përfshirë në evakuimin e mijëra personave nga zonat e pushtuara nga Rusia, e përshkroi situatën në Oleski si “ferr”. “Uria ka arritur në një pikë të tillë sa, në rastin më të mirë, një person mund të hajë një supë të hollë dhe disa lugë me një lloj qulli brenda një dite”, tha ajo, duke shtuar se banorët kanë mbetur pa ushqim, ilaçe, kujdes mjekësor, zjarrfikëse dhe para. Situata është përkeqësuar edhe nga përmbytjet e shkaktuara pas shkatërrimit të digës së Kakhovkës. Ukraina ka fajësuar Rusinë për shkatërrimin e saj, ndërsa në atë kohë diga ishte nën kontrollin e forcave ruse.

A Ukrainian posted on Instagram that her mom has managed to escape from Oleshky, Kherson region.

Here is what that person wrote:

“A week ago, my 67-year-old mother made the decision to leave the blockaded city of Oleshky on foot.

All these years, she refused to leave because she loved that town—or rather, what was left of it.

Since 2022, she had been taking care of stray animals, sheltering nearly 30 dogs and cats. In recent months, she worried more about what they would eat than about feeding herself.

But the dogs and cats started disappearing right from the yard.
Because people have nothing to eat.

During the occupation, my mother:

Lost our apartment due to a direct hit.

Lost her husband’s house to the flood caused by the destruction of the Kakhovka Hydroelectric Power Plant (and miraculously survived back then).

Lost my grandmother’s second house to a drone strike a week and a half ago (she was inside and miraculously survived again).

Yet months of starvation (everything written about people surviving in Oleshky is an understatement) forced her to choose: fear or life.
She chose life and took the risk.

She walked more than 20 km on mined roads, where cars and people are constantly targeted by drones. Then, for a week, using various means, she made her way out of the occupied area and reached Kyiv today.

I still can’t quite believe that she made it ❤️”

📹: fata_gorgo/Instagram

— Anton Gerashchenko (@Gerashchenko_en) September 30, 2026

Sipas dëshmive të banorëve, ata mbledhin ujë shiu dhe shkrijnë borën për nevojat e përditshme. Ka gjithashtu raportime se disa prej tyre janë detyruar të gjuajnë fazanë ose të kapin pëllumba për të siguruar ushqim.

Gjendja në qytet është rënduar edhe më tej nga mungesa e energjisë elektrike dhe karburantit. Spitali lokal vijon të funksionojë, por sipas autoriteteve ukrainase nuk ka energji dhe nuk disponon karburant të mjaftueshëm për gjeneratorin. Bodrumi i spitalit, ndërkohë, përdoret për ruajtjen e trupave të personave që kanë humbur jetën.

Vullnetarja Ksenia Arkhipova ka deklaruar se dimrin e kaluar të moshuar në Oleski kanë qëndruar në banesat e tyre në temperatura që kanë zbritur deri në 3 gradë Celsius. Sipas saj, disa prej tyre mbërrinin në spital të rraskapitur, pasi nuk kishin ushqim. Avokati i Popullit ukrainas, Dmytro Lyubinets, ka deklaruar se Kievi është përpjekur që prej pranverës të krijojë një korridor humanitar për të evakuuar banorët e Oleskit drejt zonave të kontrolluara nga Ukraina, por sipas tij Moska nuk është pajtuar.

Në mesin e shtatorit, Lyubinets tha se të paktën 358 persona në Oleski kishin nevojë për evakuim të menjëhershëm. Ministri i Jashtëm ukrainas Andriy Sibikha ka kërkuar gjithashtu që të hapen korridore humanitare për banorët e qytetit. Ndërkohë, Ukraina ka nisur të përdorë dronë për dërgimin e ushqimeve dhe furnizimeve të tjera. Sipas ushtrisë ukrainase, një prej operacioneve të fundit arriti të dërgojë ndihma për rreth 100 familje. Autoritetet ukrainase pretendojnë se forcat ruse kanë penguar përpjekjet humanitare dhe kanë sulmuar dronët që transportojnë ndihma. Radio Evropa e Lirë, që ka raportuar mbi situatën, thekson se disa prej këtyre akuzave nuk mund të verifikohen në mënyrë të pavarur. Kremlini ka pranuar se ka probleme me furnizimin e Oleskit me ushqime dhe ilaçe, por ia ka atribuar situatën luftimeve dhe ka fajësuar forcat ukrainase për kërcënimin ndaj rrugëve të furnizimit.

Ndërsa dimri i pestë i luftës po afrohet, autoritetet ukrainase paralajmërojnë se situata për banorët e mbetur po bëhet gjithnjë e më kritike. “Njerëzit po numërojnë orët dhe ditët, duke shpresuar se kjo situatë do të zgjidhet disi”, ka deklaruar drejtuesja e administratës lokale, Tetyana Khasanenko. Sipas zyrtarëve dhe vullnetarëve ukrainas, Oleski është shndërruar në një zonë të izoluar, të rrethuar nga fusha të minuara dhe e ekspozuar ndaj sulmeve me dronë. Ata pretendojnë se qyteti përdoret gjithashtu si pikë përqendrimi nga forcat ruse për operacione ushtarake në jug të Ukrainës.

Për këtë arsye, disa zyrtarë ukrainas e kanë përshkruar popullsinë e mbetur, veçanërisht të moshuarit, të sëmurët dhe personat me vështirësi në lëvizje, si “mburoja njerëzore”. Ndërsa luftimet vazhdojnë, banorët e Oleskit përballen me mungesën e ushqimit dhe kushteve bazë për mbijetesë, ndërsa përpjekjet për evakuimin e tyre mbeten të kufizuara nga situata ushtarake dhe fushat e minuara përreth qytetit.