TIRANE- Prokuroria e Përgjithshme pushon hetimin ndaj ministrit të Brendshëm Saimir Tahiri dhe ishdrejtorit të Përgjithshëm të Policisë së Shtetit, Artan Didi.
Në përfundim të verifikimit të një kallëzimi të Partisë Demokratike kundër tyre në lidhje me veprimet e ndërmarra prej tyre për çështjen “Doshi”, përfaqësuesit e organit të akuzës kanë vendosur mosfillimin e procedimit penal. Në kallëzim pretendohej se Tahiri dhe Didi kishin konsumuar veprat penale “shpërdorim detyre”, “moskallëzim krimi” dhe “veprime që pengojnë zbulimin e së vërtetës”.
Veprimet në shkelje të ligjit pretendohej se ishin konsumuar prej tyre pas takimeve me Durim Bamin, për shkak se nuk kishin kryer asnjë hetim konkret për deklaratat e tij, se ishte porositur për eliminimin e dy deputetëve, shkruan Panorama.
Vendimi për mosfillim hetimi ndaj Tahirit dhe Didit është marrë ditët e fundit, gati dy muaj pasi kallëzimi i PD ndaj ministrit dhe ish¬kryepolicit u depozitua në Prokurorinë e Përgjithshme. Burime pranë organit të akuzës sqaruan se në përfundim të verifikimeve paraprake është konstatuar se në veprimet e kryera nga ana e dy të kallëzuarve nuk janë gjetur elemente të veprës penale. Për këtë shkak, thanë burimet, nga ana e Prokurorisë së Përgjithshme është vendosur mosfillim i ndjekjes penale ndaj dy personave të kallëzuar. U bë e ditur se në vendimin e mosfillimit të ndjekjes penale thuhet se Policia e Shtetit ka kryer verifikimet e nevojshme pas takimit të Bamit me ministrin Tahiri dhe ish¬drejtorin Didi dhe nga prej tyre ka rezultuar se thëniet e Bamit kanë qenë të pavërteta.
Sipas Prokurorisë, fakti që historia ishte inskenim, është konfirmuar dhe nga qëndrimi i prokurorëve që po hetojnë çështjen ndaj Tom Doshit, Mark Frrokut e Durim Bamit. Në të njëjtën linjë, duke iu referuar veprimeve të kryera nga të kallëzuarit, hetuesit kanë arsyetuar se Bami në asnjë rast nuk ka pranuar ta kallëzojë rastin.
(ma.ar/BalkanWeb)
