Ky Botëror mund të shënojë një moment historik për futbollin ndërkombëtar. Për herë të parë, një trajner i huaj ka mundësinë reale të udhëheqë një kombëtare drejt titullit kampion të botës, diçka që nuk ka ndodhur kurrë më parë.

Në qendër të vëmendjes është Carlo Ancelotti, i cili ka marrë drejtimin e Brazilit, duke u bërë trajneri i parë jo-brazilian në historinë e “Seleçaos”. Bashkë me të, edhe Thomas Tuchel në stolin e Anglisë konsiderohet një nga kandidatët kryesorë për të thyer këtë tabu të futbollit botëror.

Ky edicion shquhet edhe për numrin rekord të trajnerëve të huaj. Mbi gjysma e kombëtareve pjesëmarrëse kanë zgjedhur teknikë nga vende të tjera, një tregues i qartë i globalizimit që ka përfshirë futbollin modern.

Mes tyre spikasin edhe dy emra italianë të tjerë: Vincenzo Montella me Turqinë dhe Fabio Cannavaro me Uzbekistanin, të cilët synojnë të surprizojnë në këtë turne.

Deri më sot, asnjë kombëtare nuk ka fituar Kupën e Botës me një trajner të huaj. Por me emra si Ancelotti dhe Tuchel në garë, ky Botëror mund të jetë ai që do të ndryshojë përgjithmonë një nga traditat më të forta të historisë së futbollit.