SHBA
Aktorja amerikane Evan Rachel Wood ka pretenduar se këngëtari Marilyn Manson ka abuzuar me të gjatë marrëdhënies së tyre 3-vjeçare.
Manson dhe Wood filluan lidhjen në vitin 2007 dhe u fejuan në 2010-ën, por u ndanë po atë vit. Manson ka mohuar akuzat, duke thënë se bëhej fjalë për “shtrembërime të tmerrshme të realitetit”.
Wood më parë ka thënë se ajo është një e mbijetuar e përdhunimit dhe abuzimit në familje, pa përmendur emrin e Manson. Pas akuzave të Wood, Loma Vista Recordings – që publikoi albumet e fundit të Manson – tha në një deklaratë në Twitter se nuk do të punonte më me artistin dhe do të ndalonte së promovuari albumin e tij të fundit menjëherë.
Rrjeti televiziv amerikan Starz tha se paraqitja Manson në dramën fantastike American Gods do të hiqet nga një episod i ardhshëm. Të hënën, Wood pretendoi se Manson ishte abuzuesi i saj për herë të parë përmes një deklarate të postuar në llogarinë e saj në Instagram.
“Emri i abuzuesit tim është Brian Warner, i njohur gjithashtu në botë si Marilyn Manson,” pohoi aktorja e Westworld. “Ai filloi të më joshte kur isha adoleshente dhe më abuzoi në mënyrë të tmerrshme për vite me radhë. Më bëri lavazh truri dhe u manipulova për nënshtrim.”
“Unë i kam dhënë fund frikës së hakmarrjes, shpifjes ose shantazhit. Unë jam këtu për të zbuluar këtë njeri të rrezikshëm dhe për t’u bërë thirrje industrive të shumta që i kanë dhënë mundësi atij, para se ai të shkatërrojë më shumë jetë. Unë mbështes shumë viktima të cilat nuk do të heshtin më”, -shtoi ajo.
