Kryeministri i Kosovës Albin Kurti ka takuar sot senatorët amerikanë, Chris Murphy dhe Gary Peters, me të cilët ka biseduar për zhvillimet e fundit, përfshirë dialogun me Serbinë.

Kurti ka bërë me dije se në këtë takim është theksuar rëndësia që të gjitha shtetet demokratike të qëndrojnë të bashkuara kundër agresionit rus.

“Demokracia është sistemi edhe më i fortë dhe më i brishtë, ndaj, duhet ta kultivojmë dhe ta mbrojmë. Diskutuam edhe për zhvillimet e fundit në vend, progresin edhe synimet përpara. Mes të tjerash folëm edhe për raportet me fqinjin tonë, Serbinë”, ka thënë Kurti.

Para takimit me Kurtin, senatorët amerikanë janë pritur edhe nga presidentja e vendit, Vjosa Osmani.

Aty kanë theksuar mbështetjen e Shteteve të Bashkuara për Kosovën si dhe kanë kërkuar që Serbia të ndalojë së penguari Kosovën në rrugën e saj drejt anëtarësimit në organizata ndërkombëtare.

Senatorët amerikanë kanë kërkuar që Serbia të mos e pengojë Kosovën në anëtarësimin në organizata ndërkombëtare, ndërkaq Kosova duhet që këtë vit të themelojë Asociacionin e komunave me shumicë serbe.

Dy senatorët amerikanë, Chris Murphy dhe Gary Peters, u takuan edhe me presidenten, Vjosa Osmani.

Senatori Murphy tha se si Kosova, ashtu edhe Serbia janë para zgjidhjeve të vështira.

“Serbia duhet të mos e pengojë Kosovën në anëtarësimin në organizata ndërkombëtare, dhe mendoj se është e kuptueshme që komunat me shumicë serbe të kenë njëfarë mundësie për të bashkërenditur shërbimet që i ofrojnë. Por, koha ka shumë rëndësi. Është viti kur duhet të kryhet kjo çështje dhe që të mundësohet lëvizja drejt normalizimit, që do të çojë deri te njohja e ndërsjellë. Prandaj, na vjen mirë që dëgjuam për planet tuaja për zbatimin e kësaj marrëveshjeje dhe jemi të gatshëm që t’iu përkrahim”, tha ai pas takimit me Kurtin.

Deklarata të ngjashme ai bëri edhe pas takimit që zhvilloi paraprakisht me presidenten Osmani.

“Na vjen mirë që po e shohim marrëveshjen e fundit midis Kosovës dhe Serbisë që përfshin njohjen e ndërsjellë të dokumenteve zyrtare, por edhe hapat e vështirë që duhen të ndërmerren nga të dyja palët”, tha Murphy pas takimit me të parën e shtetit.