TIRANË- Ambasadori i Shteteve të Bashkuara të Amerikës, Donald Lu ka nisur programin në “Facebook” “Pyet Ambasadorin”, ku do t’u përgjigjet pyetjeve të drejtpërdrejta të qytetarëve në faqen e Ambasadës Amerikane në “Facebook”.
Lidhur me procesin e dekriminalizimit të Kuvendit, dhe sjelljen e partive politike, ambasadori Lu u shpreh se, “ajo që ne vlerësojmë nuk është retorika, por më tepër veprimet që janë marrë nga Prokurori i Përgjithshëm, parlamenti, liderët partiakë dhe të tjerët. Është e rëndësishme që të vazhdojë procesi i dekriminalizimit që është nisur me dhjetor 2014 me marrëveshje midis palëve. Ne vazhdojmë të inkurajojmë të gjitha partitë politike në Shqipëri për të hequr individët e përfshirë në aktivitete kriminale ose të korruptuar. Duartrokasim veprimet e Prokurorit të Përgjithshëm për të sjellë akuzat kundër dy deputetëve”.
Lidhur me mbështetjen që SHBA do të japin për Byronë Kombëtare të Hetimit, ambasadori Lu theksoi se, “është e rëndësishme që Shqipëria të krijojë një Byro Kombëtare të Hetimit, pasi së pari, duhet të ketë një organ të zbatimit të ligjit me kapacitet të avancuar hetues. Së dyti, gjithashtu duhet të ekzistojë një organ që ka autoritetin për të hetuar zyrtarët në nivelet më të larta. Ekipi ynë nga FBI amerikane ishte këtu këtë javë për të diskutuar se si ne mund të mbështesim krijimine BKH shqiptare në përpjekjet e saj për të luftuar korrupsionin, krimin e organizuar dhe trafikun e drogës. Institucionet gjyqësore dhe Prokuroria e Përgjithshëm duhet të vazhdojnë të përmbushin përgjegjësitë e tyre për të zbatuar ligjin dhe për të siguruar proces të drejtë”.
Ambasadori Lu u shpreh se ka shpresa shumë të larta për Shqipërinë në dhjetë vitet e ardhshme. “Institucione të forta të pavarura në çdo nivel dhe qeveri funksionale, lumenj të pastër dhe liqene, brigje dhe vargje malore të mbushur me më tepër turistë, dhe institucione arsimore me cilësi të lartë që tërheqin studentët nga jashtë vendit. Unë besoj se ky vend mund të arrijë kaq shumë. Shpresa ime është që Shqipëria do të vazhdojë punën e vështirë që është ende e nevojshme për të përsosur të ardhmen e saj shumë të ndritshme”, tha Lu.
Përsa i përket korrupsionit në vendin tonë, ambasadori Lu theksoi se, “Unë mendoj se njerëzit në Shqipëri, qeveria, bizneset dhe të tjerët duhet të pranojnë se ka një problem me korrupsionin në Shqipëri. Korrupsioni duhet të adresohet me forcë dhe në mënyrë sistematike. Kur ne mendojmë për korrupsionin, ne mendojmë për dy lloje të ndryshme – atë të njerëzve të zakonshëm që paguajnë për të marrë shërbime, të cilëve u kërkohet të paguajnë për shërbime. Një tjetër është korrupsioni i nivelit të lartë. Akuzat e tanishme kundër anëtarëve të parlamentit janë dëshmi se ka një përparim, duke iu kundërvënë idesë se askush nuk është i paprekshëm. Askush nuk është mbi ligjin. Ne i mbështesim fuqimisht këto përpjekje në politikë, në gjyqësor, në sektorët publik dhe privat, dhe kudo.
(m.k/BalkanWeb)
