Një burrë i veshur si Batman po tërheq vëmendjen në Londër, duke ndihmuar qytetarët të përballojnë shpenzimet e përditshme. Identiteti i tij mbetet i panjohur, por videot ku shfaqet duke shpërndarë kuponë karburanti dhe duke paguar gjoba parkimi kanë ngjallur interes në mediat britanike dhe rrjetet sociale. Ai u prezantua për herë të parë më 22 shtator përmes Instagramit, përpara Syrit të Londrës, duke premtuar se do të përpiqej të zgjidhte “problemet e londinezëve”.
Një nga veprimet më të dokumentuara u zhvillua më 16 tetor, në një pikë karburanti në juglindje të kryeqytetit britanik. Burri i maskuar u shpërndau shoferëve kuponë me vlerë 70 paund, ndërsa lajmi krijoi radhë automjetesh. Sipas dëshmisë së një banori, të regjistruar nga shoqata lokale Lee Manor, vlera totale e kuponëve të shpërndarë ishte të paktën 3.500 paund.
Në një tjetër ndërhyrje pranë Spitalit Kingston, pamjet e transmetuara nga mediat britanike e tregojnë duke paguar gjobat e parkimit të qytetarëve. Ai shpjegoi se njerëzit që përballen me probleme shëndetësore apo vizitojnë të afërmit nuk duhet të rëndohen edhe nga këto shpenzime. Megjithatë, pagesat nuk janë konfirmuar publikisht nga bashkia. Sipas raportimeve, burri ka bashkëpunuar edhe me një lokal në Archway për të ofruar për disa ditë vakte me pulë dhe patate të skuqura për vetëm një paund. Atij i atribuohen gjithashtu aksione pastrimi dhe shpërndarja e ventilatorëve të vegjël për pasagjerët e metrosë.
Duke folur për ITV, “Batmani” tha se synon t’u japë londinezëve “shpresë për një të nesërme më të mirë”. “Nuk ke nevojë të jesh mbinjeri për të qenë hero”, ishte mesazhi i tij. Mbetet e paqartë se kush i financon këto veprime dhe nëse bëhet fjalë për një nismë bamirësie, një projekt për rrjetet sociale apo një ndërthurje të tyre. YouTuber-i Niko Omilana, të cilin disa e kanë përmendur si personin e mundshëm pas maskës, e ka mohuar përfshirjen kur është pyetur nga BBC.
