Senatori amerikan Bernie Sanders të hënën sulmoi bllokadën e vazhdueshme të Izraelit për ndihmën humanitare në Gaza, duke e quajtur kufizimin një “krim lufte” dhe duke kërkuar t’i jepet fund ndihmës ushtarake amerikane për Izraelin.

“Kanë kaluar 51 ditë që kur ndonjë ndihmë humanitare ka hyrë në Gaza,” shkroi Sanders në X.

“Ministri izraelit i Mbrojtjes Katz ka thënë: ‘Politika e Izraelit është e qartë: asnjë ndihmë humanitare nuk do të hyjë në Gaza’. Ky është një krim lufte, ne duhet t’i japim fund bashkëpunimit tonë.

Ushtria izraelite rifilloi sulmin e saj në Gaza më 18 mars, duke prishur marrëveshjen e armëpushimit dhe shkëmbimit të të burgosurve më 19 janar. Ajo ka vrarë më shumë se 51,200 palestinezë në Gaza që nga tetori 2023.

Izraeli ndaloi dërgimin e ndihmës në enklavë më 2 mars, pas përfundimit të fazës së parë të marrëveshjes.

Gjykata Ndërkombëtare Penale ka lëshuar urdhër-arreste për kryeministrin Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavë.

(A.A/BalkanWeb)