Policia e Beratit ka bllokuar një automet që transportonte lëndë drusore të prera në mënyrë të paligjshme, duke proceduar penalisht shoferin.
Njoftimi i policisë:
Në kuadër të bashkëpunimit me strukturat e DVP Berat dhe në zbatim të planit të masave për parandalimin dhe goditjen e krimeve mjedisore, shërbimet e policisë kanë konstatuar dhe ndaluar në Rreth-rrotullimin e Poshnjes, një mjet furgon që transportonte lëndë drusore.
Gjatë kontrollit të ushtruar, shërbimet e Policisë kanë konstatuar se shtetasi D.H.,ishte duke transportuar lëndë drusore të prerë në mënyrë të paligjshme.
Drejtuesin e mjetit , shtetasin D.H., 35 vjeç banues në Fier në përfundim të veprimeve, specialistët për Hetimin e Parandalimin e Krimit e kanë proceduar penalisht.
Materialet në ngarkim të tij janë referuar në Prokurorinë e Rrethit Gjyqësor Berat, për veprime të mëtejshme.
Policia e Shtetit do të vijojë kontrollet për parandalimin dhe goditjen e krimeve mjedisore dhe në këtë kuadër kërkon bashkëpunimin e qytetarëve që të denoncojnë çdo rast të paligjshmërisë në Komisariatin Dixhital apo në numrin pa pagesë 112, duke siguruar anonimatin dhe reagim të paanshëm kundrejt shkelësve të ligjit.
(BalkanWeb)