Gazetarët Yegor Polyakov dhe Aleksandra Miroshnikova, kritikë të regjimit të presidentit rus Vladimir Putin, që punojnë për gazetën ruse online Lenta.ru, thanë për CNN se ideja për të publikuar dhjetëra artikuj kritikë ndaj presidentit rus Vladimir Putin lindi sepse ata nuk mund të vazhdonin të punonin si zakonisht me luftën në Ukrainë që po vazhdonte.
Artikujt u botuan në Lenta.ru, një gazetë pro-Kremlinit në Rusi, më 9 maj. Ajo përkoi me Ditën e Fitores së Rusisë, një festë e madhe kombëtare në vend që feston dorëzimin e nazistëve në Berlin gjatë Luftës së Dytë Botërore.
Dy gazetarët publikuan një sërë artikujsh me tituj të tillë si “Putini nisi një nga luftërat më të përgjakshme të shekullit të 21-të” dhe “Vladimir Putin gënjeu për planet e Rusisë në Ukrainë”.
“Ideja na erdhi pothuajse në të njëjtën kohë. Ne as që duhej të diskutonim me njëri-tjetrin për nevojën e këtij vendimi. Ishte thjesht e pamundur të vazhdonim të punonim si zakonisht kur njerëzit po vdesin në një vend fqinj. Disa njerëz thonë: Nuk kishim zgjidhje tjetër veçse të vazhdonim punën. Ne nuk kishim zgjidhje tjetër veçse të bënim atë që bëmë. Ishte i vetmi vendim i duhur për ne”, i thanë ata.
Të frikësuar nga hakmarrja ndaj familjeve të tyre në Rusi, dy gazetarët nuk do të hynin në detaje se si i publikuan artikujt. Por ata thanë se javët e funfdit në punë klanë qenë të vështira, duke fjetur vetëm dy deri në pesë orë në ditë.
“Artikujt që kemi botuar nuk janë thjesht tituj tërheqës, janë materiale të menduara mirë, me të gjitha linqet e përfshira, me inserte vizuale”, thanë të dy.
Është e paqartë nëse dy gazetarët janë shkarkuar nga Lenta.ru, por ata thonë se nuk kanë më akses në mjetet e publikimit të faqes.
“Ndoshta kjo do të ketë pasoja serioze për ne”, tha në ata por shtuan se shpresojnë se të tjerët në Rusi do të frymëzohen për të bërë të njëjtën gjë. Tani për tani, të dy thonë se nuk janë më në Rusi.
“Nuk e di se çfarë do të ndodhë më pas. Unë jam në një vend tjetër, krejtësisht vetëm, kam disa kursime të vogla për të jetuar për disa muaj. Por nuk e kam idenë se çfarë të bëj, ku të shkoj dhe si të jetoj. Shpresoj se do ta kuptoj” , tha Miroshnikova.
Ndërsa të dy kanë marrë përgjigje pozitive nga disa lexues duke i falënderuar dhe duke u ofruar atyre strehim, të tjerët, domethënë kolegët dhe anëtarët e familjes ishin më pak mbështetës.
“Për mua personalisht situata është mjaft e vështirë, sepse shumë nga të afërmit e mi nuk e miratuan fare vendimin tim. Dikush e konsideroi tradhti, dikush thjesht marrëzi, për shkak të së cilës do të mbetem pa punë dhe pa të ardhme”, tha Miroshnikova.
(BalkanWeb)
