Alvaro Morata pritet të humbë ndeshjet e radhës me përfaqësuesen spanjolle, pasi është dëmtuar në sfidën e sotme mes Çelsit dhe Mançester Sitit. Futbollisti spanjoll, ishte në listën e Lopeteguit për sfidat kundër Shqipërisë dhe Izraelit dhe mendohej se do të ishte titullar, por tani rrezikon të qëndrojë jashtë fushave të lojës për disa javë.

Në fundin e pjesës së parë, lojtari u ndal ndërsa po vraponte pasi ndjeu dhimbje në pjesën e prapme të kofshës së majtë dhe u nis menjëherë drejt dhomave të zhveshjes, duke bërë të qartë se kishte pësuar një tërheqje dhe nuk mund të vazhdonte në këtë sfidë.

Ky dëmtim mund të detyrojë Lopeteguin të thërrasë një sulmues tjetër në ekip, pasi ka në listën e tij si “9” të mirëfilltë vetëm Iago Aspas dhe Rodrigo. Diego Kosta mungon meqë nuk ka zhvilluar fazë përgatitore normale për këtë sezon pas problemeve me Çelsin, ndërsa David Vija u la jashtë listës meqë kishte pësuar një dëmtim në MLS. (p/sport)

(BalkanWeb)