Nga plumbat drejt hotel “Volorekës” në vitin 2020, sulmi ndaj Nikolla Agollit në berberhane në janar të 2025, deri te shitja e lëndëve narkotike, plagosja e 35-vjeçarit Brian Syzo në Pogradec mes dritëhijeve të shumta.
Një ditë pas ngjarjes, policia veç Nikolla Agollit, ka arrestuar 30-vjeçarin David Prifti, si dhe ka shpallur në kërkim vëllanë e tij Edison Agollin dhe Meard Berberin, të cilët ishin me autorin e dyshuar të ngjarjes kur qëlloi drejt 35-vjeçarit Syzo, i cili e kishte ndalur mjetin në rrugë dhe po priste shokun e tij.
Pasi ka mbërritur shoku i Brian Syzos, doli nga automjeti i tij dhe u afrua për të hipur në makinën e 35-vjeçarit. Në të njëjtën kohë mbërrijnë Nikolla Agolli me vëllanë dhe 2 miqtë e tyre, qe fillimisht thyen xhamin e përparmë të mjetit të shokut të Syzos. Nga këto të dhëna rezulton se Brian Syzo sapo doli nga makina, u përball me reagimin e menjëhershëm të Nikolla Agollit i cili e qëlloi me disa plumba 35-vjeçarin duke e lënë të plagosur rëndë. Pas plagosjes, autori dhe tre bashkëpunëtorët janë larguar nga vendngjarja, duke braktisur mjetin në Qafë-Thanë e më pas u shpërndanë. Nikolla Agolli u kap disa minuta pas ngjarjes në një fugon në Prrenjas dhe pas tij u kap edhe David Prifti.
Nga ana tjetër, i plagosuri u dërgua në Spitalin e Pogradecit nga shoku i tij dhe më pas u nis drejt “Traumës” me helikopter, pasi plumbat i kanë prekur një nga venat kryesore të këmbës.
Brian Syzo dhe personat të cilët tentuan ta vrisnin nuk janë emra të panjohur për forcat e rendit. 35-vjeçari Syzo ka qenë pjesë e grupit të zjarrit që sulmuan hotel “Volorekën” në 2020, ku si organizatorë u akuzuan Ilir Berberi dhe Meard Berberi. Duket se marrëdhënia mes 35-vjeçarit Syzo dhe Meard Berberit është krisur, pasi ky i fundit bashkëpunoi me Nikolla Agollin për ta eliminuar. Meard Berberi ka qenë i dënuar për disa vepra penale, ku pas daljes nga burgu në vitin 2024 i shpëtoi një atentati me lëndë plasëse.
Edhe vet Nikolla Agolli i shpëtoi një sulmi në janar të vitit 2025, kur vëllai i Brian Syzos, Sindi Syzo e plagosi me thikë brenda një berberhaneje, ngjarje që mund të jetë bërë shkak për ngjarjen e 29 qershorit. Ne kërkim mbeten Edison Agollit dhe Meard Berberit, ndërsa gjatë kontrolleve për kapjen u tyre u sekuestruan në cilësinë e provës materiale 3 automjete dhe 6 aparate celularë.
