Avokati Spartak Ngjela hodhi akuza të forta ndaj gjyqtarëve shqiptarë, teksa tha se kanë bërë kërdinë, duke falsifikuar e grabitur rreth 60% të pronave, e ndërsa paralajmëroi se “Kur të dëgjoni të dhëna se si korrupsioni është i bashkuar me krimin, do t’i dridhet mishi gjithë Shqipërisë”.
Në një lidhje me “Skype” për emisionin “Open” të gazetares Eni Vasili, në News24, avokat Ngjela deklaroi se pushteti gjyqësor ka qenë i korruptuar deri në palcë dhe reforma në drejtësi spastroi mbi 60% të gjyqtarëve.
“Do të keni parasysh, ekuacioni nuk është ky, ekuacioni është ky që po them unë: është pushtet gjyqësor i korruptuar deri në palcë. Ka qenë një pushtet tjetër me sekserë. Këto janë vlera negative të shoqërisë, nuk janë drejtësi. Ka filluar reforma në drejtësi, e cila ka ekskluduar rreth 60% të gjyqtarëve dhe duhet të jemi racionalë në atë që themi. Dëgjoni me vëmendje, janë falsifikuar 60% të pronave, janë grabitur mbi 60% e pronave nga gjyqtarët, është bërë kërdi e madhe dhe po shkonim drejt falimentit. Nuk ka pasur drejtësi fare në Shqipëri.
Drejtësia ka qenë në një mjerim korruptiv vjedhjesh. Tani jemi në një reformë në drejtësi, që drejtohet nga Uashingtoni. Në këto momente ka dalë SPAK, por nuk mjafton. Kur të dëgjoni të dhëna se si korrupsioni është i bashkuar me krimin, do t’i dridhet mishi gjithë Shqipërisë. Do t’i dëgjoni, mos u mërzisni. Ishte tmerr. Nuk i ka ndodhur asnjë shoqërie kjo. Nga viti 1914 e deri para dy vitesh nuk ka pasur fare drejtësi në Shqipëri, por ka pasur mjelë të lopës dhe lopa ka qenë populli. Korrupsion gjigant, një marrëveshje e fshehur mes pushtetit gjyqësor dhe politikës”, tha avokat Ngjela.
(BalkanWeb)
