Partia Agrare Ambientaliste mbajti këtë të shtunë Asamblenë Zgjedhore. Kryetari i PAA, Agron Duka, në fjalën e tij tha se vendi ndodhet në një situatë të vështirë ku korrupsioni është kthyer në rrezik për shoqërinë dhe ekonominë.

Ai tha se rezultatet e zgjedhjeve të kaluar ishin zhgënjyese, ku kishte bashki që kjo parti nuk ka marrë asnjë këshilltar.

Duka shtoi se duhet të nisë puna për zgjedhjet e 2025, ndërsa shtoi se kjo duhet bërë duke shkuar tek populli dhe duke dëgjuar problemet e hallet e tyre.

“Në Tiranë e Shkodër kishim rezultate zhgënjyese ku nuk morëm asnjë këshilltar. Puna duhet të nisë që tani për rezultate të mira. Shqipëria është në një situatë të keqe, korrupsioni është rrezik për shoqërinë dhe ekonominë. Zyrtarë të lartë janë kthyer në biznesmenë duke u përfshirë në tendera, duke e kthyer ekonominë në monopol shpesh në partneritet edhe me krimin. U rrit kontrolli mbi median dhe presioni mbi opozitën. Opozita humbi 3 vite duke u përçarë e duke luftuar mes vetes, kjo i dha qeverisë më shumë hapësirë të zgjerojë pushtetin e saj dhe të rrisë dozën e abuzimit”, tha ai.

Gjithashtu, aleati tradicional i demokratëve, Agron Duka kërkoi ndryshim të ligjit zgjedhor për të korrigjuar ndryshimet që në të shkuarën penalizuan partitë e vogla duke nisur me rikthimin e kolaicioneve me listë të përbërë.

”Ne si parti politike jemi të qartë në kërkesat tona. Kërkojmë rikthimin e koalicioneve zgjedhore që u hoqën në mënyrë absurde. Kërkojmë lista të hapura, votë të qytetarëve në emigracion, votim dhe numërim elektronik”, theksoi Duka.