Tërmeti që shkundi Shqipërinë dhe që ka shkaktuar deri më tani 32 viktima, ka tronditur të gjithë shqiptarët kudo që ndodhen. Solidarizimi ka qenë i menjëhershëm, ndihmat kanë qenë te shumta qoftë nga shqiptarët e Kosovës, ashtu edhe nga ata të Maqedonisë së Veriut. Bota e futbollit natyrisht që nuk ka bërë ndryshe.
Skuadrat shqiptare dhe tifogrupet kanë nisur grumbullimin e ndihmave për të prekurit, ndërsa FSHF ka vendosur të ndërpresë kampionatin parë situatën e jashtëzakonshme në vend.
Ndërkohë Durrësin e kanë vizituar dhe presidentët e FFK-së dhe FMF-së, Agim Ademi dhe Muamd Sejdini, teksa ka qenë kreu i FSHF-së, Armand Duka, ai që në faqen e tij në Facebook, ka njoftuar se komuniteti i futbollit do të ndërtojë 3 nga shtëpitë e rrënuara.
Postimi i Dukës
Sot në Durrës prita & takova me kënaqësi miqtë dhe homologët e mi Presidentë të Federatës së Futbollit të Kosovës dhe Federatës së Futbollit të Maqedonisë së Veriut, Agim Ademi dhe Muamed Sejdini, të cilët shprehën dëshirën për t’ju bashkuar FSHF-së në kontributin për familjet e prekura nga tërmeti. Duke u nisur nga dëshira dhe nga gadishmëria nga i gjithë komuniteti i futbollit, ne marrim përsipër rindërtimin e tre shtëpive të rënuara. Fushata e ndihmës nga ana e FSHF-së do vijojë në ditët në vazhdim. Ne jemi një skuadër!
(Balkanweb)
