Policia greke ka shkatërruar një organizatë kriminale të dyshuar për trafikim të sasive të mëdha të lëndëve narkotike në Mykonos dhe zonën e Atikës, në kuadër të një operacioni të gjerë hetimor që çoi në arrestimin e gjashtë personave.

Sipas autoriteteve, operacioni u zhvillua mëngjesin e së mërkurës pas një hetimi të zgjeruar që përfshiu përdorimin e teknikave speciale hetimore, analizë të komunikimeve, verifikime të kryqëzuara të të dhënave dhe profilizim të personave të dyshuar. Hetimi ka dokumentuar aktivitetin e grupit që nga mesi i prillit 2026.

Grupi dyshohet se funksiononte si një rrjet i mirëstrukturuar me hierarki të qartë dhe role të ndara, duke vepruar kryesisht në zona me fluks të lartë turistik dhe ekonomik.

Në krye të organizatës ndodhej një 37-vjeçar me origjinë shqiptare, i cili dyshohet se koordinonte të gjithë aktivitetin kriminal: sigurimin e furnitorëve të drogës, organizimin e transportit, menaxhimin e pikave të fshehjes (depo), shpërndarjen në treg dhe kontrollin e fitimeve të paligjshme.

Si bashkëpunëtor i tij i drejtpërdrejtë dyshohet një 38-vjeçar grek, i cili kishte rol kyç në shpërndarje, kontakt me klientët dhe menaxhimin e pjesëve të ndryshme të rrjetit. Autoritetet e përshkruajnë atë si “zëvendësdrejtor” të organizatës.

Një 25-vjeçar kishte detyrë kryesore gjetjen e klientëve, shpërndarjen e drogës dhe mbikëqyrjen e transaksioneve të vogla në terren.

Ndërkohë, një 38-vjeçar nga Rumania dyshohet se kishte rol mbështetës në ruajtjen e drogës, administrimin e depove dhe mbikëqyrjen e pikave të fshehjes, si dhe pjesëmarrje të herëpashershme në shpërndarje.

Një grua 31-vjeçare u arrestua për posedim droge, ndërsa dyshohet se kishte lidhje me rrjetin.

Hetimet kanë zbuluar se anëtarët e grupit kishin krijuar edhe një aktivitet të ligjshëm në dukje, një kompani shërbimesh transporti me furgonë në Mykonos. Kjo kompani përdorej si mbulesë për lëvizje, shpërndarje dhe kontakt me klientë, duke justifikuar udhëtime të shpeshta në ishull.