Gazetari Mustafa Nano i ka bërë thirrje gjyqtarit që ka marrë në ngarkim çështjen e Fredi Belerit, kryetarit të ri të Bashkisë së Himarës, që ta lirojë këtë të fundit nga burgu. Në një reagim, Nano në këtë rast gjyqtari do të tregojë se është patriot, ndërsa ngre pikëpyetje për veprimet e prokurorit që ka bërë hetimet.
“Vërtet besoni se prokurori i ka vënë prangat Belerit mbi bazën e ndërgjegjes profesionale?”, shkruan gazetari.
REAGIMI
Duhet të dalë një gjyqtar ta ndreqë lajthimin e bërë nga prokurorët: ta nxjerrë Belerin nga burgu. Sa më shpejt, aq më mirë. E di, fjala e institucioneve do duhej të kishte gjithnjë epërsi mbi “trillet” e zgjedhësve, por të mbrosh me forcë këtë parim në Shqipëri është pesë me hiç (po shohim se edhe në SHBA mjafton mbështetja elektorale për t’i dhënë dikujt impunitet: shikoni se ç’ndodh me Trumpin). Prandaj, i nderuar gjyqtar i çështjes, preje këtë “nyje gordiane”, pa e zgjatur dhe pa iu nënshtruar histerive medemek patriotike. Patriot do jesh ti, e jo ata që gjetën arsye për t’i vënë prangat një kandidati jo qeveritar tri ditë para zgjedhjeve. Patriot do jesh ti, e jo ata që, me veprimin e tyre, u bënë shkak që Himara të binte në duart e një njeriu si Beleri. E nuk do kryesh me këtë veç një veprim patriotik. Do kryesh edhe një veprim inteligjent diplomatik. Po skrupujt profesionalë? – do thotë ndokush. Përgjigja ime është: vërtet besoni se prokurori i ka vënë prangat Belerit mbi bazën e ndërgjegjes profesionale? Unë nuk besoj. Po të kishim prokurorë të tillë, do të kishim të arrestuar me dhjetra kryebashkiakë të zgjedhur.
Ka zëra që po lusin krejt tjetër gjë, me fjalë të tjera po lusin që të dalë një gjyqtar që ta dënojë njëherë e mirë Belerin; ose ta mbajë edhe pak në pranga në mënyrë që Rama të ketë një justifikim për ta shkarkuar shpejt e shpejt kryebashkiakun e sapozgjedhur të Himarës. E ka Rama në plan një gjë të tillë? Duhet shpresuar që jo. Në mos, do të ishte një double down që do të ngrinte pikëpyetje serioze të natyrës politike e legale këtu brenda (nuk ka të ngopur ky njeri? Dëshiron t’u marrë kundërshtarëve edhe një nga pak trofetë e fituara?), por edhe do të çonte në zgrip marrëdhëniet me fqinjët tanë, që s’e kanë për gjë të ndezin fitilin e sherrit për çdo horr që del këtyre anëve për t’i fryrë zjarrit të përçarjes e armiqësisë me shqiptarët.
(BalkanWeb)
