MAQEDONI- Njëri nga liderët e grupit të Kumanovës, Muhamet Krasniqi, i njohur me nofkën Komandant Malisheva ka tentuar të bëjë vetëvrasje, mëson nga burime jozyrtare televizoni “Alsat M” në Shkup. Sipas informacioneve deri tani të pakonfirmuara tentativën për të vrarë veten, Krasniqi e ka kryer duke pirë acid sulfurik.
Informacionet flasin se megjithatë, në një moment të caktuar ai është penguar në qëllimin e tij. Supozohet se ka pirë një pjesë të tretjes, por është shpëtuar. Nuk ka ende informacione të konfirmuara lidhur me gjendjen shëndetësore të Krasniqit, por as për motivet e këtij veprimi.
Korrespondenti i “Kohës Ditore” nga Shkupi ka provuar të mësojë përmes rrugës zyrtare, se çfarë ka ndodhur në të vërtetë me të paraburgosurin Krasniqi.
“Që në orët e paradites dërguam disa pyetje deri te Drejtoria kompetente për zbatimin e sanksioneve, por deri në këto momente nuk kemi kurrfarë përgjigje”, thekson ai.
Ky rast ndodh në një periudhë kur pjesëtarët e dyshuar të “Grupit të Kumanovës” japin deklaratat e tyre përpara prokurorit publik. Sipas burimeve të afërta me të arrestuarit, ata kanë pasur një ndjenjë të pasigurisë, ndërsa kanë kërkuar që edhe deklaratat që do t’i japin para prokurorit të jepen para kamerave, përkatësisht të xhirohen. Para vetëm disa ditëve avokatët e tyre ankoheshin se në kundërshtim me Ligjin për procedurë penale, klientët e tyre nuk kanë pasur qasje në dëshmitë kundër tyre, para se t’i jepnin deklaratat. Nga Prokuroria publike sot kanë theksuar se do t’ua japin dëshmitë, por vetëm pasi të kompletohen.
“Në Prokurorinë Themelore Publike për ndjekjen e kriminalitetit të organizuar dhe korrupsionit, marrja në pyetje e të dyshuarve është në fazën finale. Disa prej të dyshuarve gjatë ditëve në vijim duhet të merren në pyetje. Pas kompletimit të dëshmive, para përfundimit të procedurës hetuese ato do t’iu jepen për shqyrtim personave të dyshuar dhe mbrojtjes”, njoftojnë nga Prokuroria Publike e Maqedonisë.
Nga Prokuroria Publike, megjithatë nuk ka dhënë një numër të saktë edhe sa të dyshuar do të merren në pyetje dhe kur mund të pritet propozimi për aktpadinë.
Në Kumanovë humbën jetën 8 policë e 10 pjesëtarë të grupit, ndërsa për rastin të dyshuar janë 33 persona.
(b.e/BalkanWeb)
