Irani ka ndaluar mësimin e të gjitha gjuhëve të huaja, përfshirë anglishten dhe arabishten, në kopshte dhe shkolla fillore, me efekt të menjëhershëm, njoftoi media shtetërore.
“Mësimi i gjuhëve të huaja është i ndaluar në kopshte, çerdhe dhe shkolla fillore, sepse në këtë moshë, identiteti iranian i fëmijës po formohet,” tha Massoud Tehrani-Farjad , një zyrtar i ministrisë së arsimit.
Republika Islamike e kishte ndaluar tashmë mësimin e gjuhës angleze në shkollat fillore në vitin 2018, megjithëse ajo mësohet nga shkolla e mesme e tutje.
“Ndalimi i mësimit të gjuhëve të huaja nuk ka të bëjë vetëm me anglishten, por edhe gjuhët e tjera, përfshirë arabishten”, nënvizoi Tehrani-Farjad.
Persishtja, e vetmja gjuhë zyrtare në Iran, është e ndikuar fuqimisht nga arabishtja, por gjithashtu ka huazim nga frëngjishtja dhe anglishtja.
Ministria e Arsimit kishte sinjalizuar në qershor 2022 planin e saj për të filluar një “provë për të mësuar frëngjisht ” në shkollat anembanë vendit për “eliminimin e monopolit të gjuhës angleze”.
Në shtator, qeveria i ndaloi studentët iranianë ose me shtetësi të dyfishtë të ndiqnin shkollat ndërkombëtare, duke thënë se fëmijët iranianë kishin një detyrim të ndiqnin kurrikulën shkollore të vendit .
Vendimi çoi në një rënie të papritur të numrit të studentëve në disa shkolla ndërkombëtare