Pak minuta më parë ka nisur seanca e KLGJ për gjyqtaren Enkeleida Hoxha.
Inspektori i Lartë i Drejtësisë, Artur Metani, ka kërkuar shkarkimin nga detyra të magjistrates Hoxha, pasi sipas tij, ajo nuk ka respektuar kriteret për amnistitë dhe se në 5 procese kishte mungesë në arsyetimin nga detyra.
Ndërkohë, gazetarja Klodiana Lala, raportoi për “BalkanWeb”, se Enkeleida Hoxha e ka folur shkurt në seancë, duke pretenduar se në asnjë moment nuk ka shkelur ligjin. Gazetarja shtoi se më së shumti në seancë ka folur avokati i saj, Ardian Vishaj.
Ky i fundit sipas gazetares, ka theksuar përpara KLGJ se në operacionin e SPAK ka pasur një ndikim politik, duke parë dhe dinamikën se si ndodhi arrestimi. Kujtojmë që pak ditë më parë SPAK rrëzoi kërkesën e gjyqtares për të zbutur masën arrest me burg, me arsyetimin se ka një djalë me sëmundje të pashërueshme, vajza e mitur ka braktisur shkollën dhe prindërit e saj të sëmurë nuk janë në gjendje sipas saj të kujdesen për të. Vendimi përfundimtarë për gjyqtaren pritet të merret nga Gjyqësori, theksoi ndër të tjera gazetarja.