Shefi i Grupit Parlamentar të PDK-së, Arian Tahiri, ka kërkuar zbatimin e plotë të ndryshimeve të miratuara në Ligjin për Dhomat e Specializuara të Kosovës, duke theksuar se ligjet e miratuara nga Kuvendi janë detyrim dhe jo çështje vullneti.

Në një reagim në Facebook, Tahiri deklaroi se institucionet dhe qytetarët duhet të mbështesin zbatimin e ligjit pa përjashtime, duke shtuar se Kosova duhet të veprojë si shtet sovran.

Ndërkohë, Bashkimi Evropian ka shprehur shqetësim të thellë për ndryshimet ligjore, duke vlerësuar se ato bien ndesh me detyrimet ndërkombëtare të Kosovës. BE-ja ka kërkuar respektimin e pavarësisë së Gjykatës Speciale dhe vazhdimin e punës së saj në përputhje me mandatin aktual.

Ndryshimet e sponsorizuara nga PDK-ja parashikojnë kufizimin e mandatit të Speciales dhe kalimin në Kosovë të shkallës së tretë të gjykimit në çështjen ndaj ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi.

Projektligji u miratua në lexim të dytë pas një marrëveshjeje mes Lëvizjes Vetëvendosje dhe PDK-së, ndërsa procesi është shoqëruar me protesta në Kosovë.

Më 16 shtator, Gjykata Speciale shpalli vendime dënimi për katër ish-udhëheqësit e UÇK-së për krime lufte, me dënime që, sipas raportimit, arrijnë në 81 vjet burgim në total.

Ndërkohë, kundërshtimi ndaj vendimeve të Gjykatës Speciale ka vijuar përmes protestave në Kosovë dhe në vende të tjera ku jetojnë shqiptarë. Për 10 tetor është paralajmëruar edhe një protestë në Bruksel.