TIRANË
Kreu i Strukturës së Posaçme Anti-Korrupsion, Arben Kraja, i ka kërkuar përmes një shkrese Këshillit të Lartë të Prokurorisë që të shtojë numrin e prokurorëve. Kjo kërkesë e tij vjen pak ditë pas ngritjes së SPAK-ut. Kjo strukturë e re e drejtësisë pritet të hetojë dosje të “nxehta” kriminale, por edhe çështje të tjera me karakter politik.
Aktualisht në strukturën e SPAK-ut janë tetë prokurorë, ndërsa dy të tjerë pritet të emërohen në ditët në vijim. Para se të nisnin punën tyre në SPAK, tetë prokurorët u betuan para Presidentit të Republikës, Ilir Meta.
“BalkanWeb” mëson se këshilli gjithashtu po diskuton aktualisht mbi shkresën e ardhur në KLP nga drejtuesi i SPAK, Arben Kraja, për transferimin të përkohshëm në SPAK të 2 prokuroreve, Dritan Prençi dhe Vladimir Mara. Kjo shkresë ka mbërritur në Këshillin e Lartë të Prokurorisë me 23 dhjetor, ndërsa Këshilli ka afat ligjor tre ditë për të marrë një vendim për këtë çështje.