TIRANË
Drejtori për Evropën Qendrore dhe Jugore në Departamentin Amerikan të Shtetit, David Kostelancik po qëndron për një vizitë zyrtare në Tiranë, ndërsa kryefjalë e takimeve të tij ka qenë kriza politike dhe gjetja e mundësive për tejkalimin e saj.
Zyrtari i DASH ka përfunduar në këto momente një takim me kreun e Partisë Demokratike, Lulzim Bashën. Takimi mes tyre u zhvillua në selinë blu dhe zgjati rreth 60 minuta.
Axhenda e zyrtarit të lartë do të vijojë të jetë e ngjeshur, pasi sot pasdite në orën 17:00, Kostelancik do takohet edhe me kryeministrin, Edi Rama.
Kriza dhe mungesa e dialogut është përcjellë me shqetësim të madh jo vetëm nga faktori politik vendas, por edhe nga organizmat ndërkombëtarë. Ata kanë bërë thirrje për kapërcimin e ngërçit politik, i cili për fat të keq vijon të qëndrojë “këmbëkryq” prej muajsh në vendin tonë.
