Grupet kriminale shqiptare kanë ngritur alarmin në shumë vende të huaja. Jo pak herë mediat e huaja ndërkombëtare kanë shkruar lidhur me mafien shqiptare duke ngritur shqetësimin për lidhjet e tyre të forta në botën e krimit.

Media ekuadoriane në një artikull të zgjeruar shkruan për mënyrën se mafia shqiptare zgjeroi aktivitetin e saj të trafikut të drogës  të lidhura edhe me biznesmenë. Shqipëria ishte pas perdes së hekurt. Ndërmjet viteve 1945 dhe 1990, kufijtë e saj mbetën të mbyllur dhe shkëmbimi me botën ishte i kufizuar.

Me akses të kufizuar në investime dhe infrastrukturë të dobët, ekonomia e saj ishte një nga më të dobëtat në bllokun komunist,bëhet me dije sipas raportit “Tentakula transnacionale, pika aksesi për grupet kriminale në Ballkan”, nga studiuesi Walter Kemp.

Në mesin e viteve 1960, u hap një venë e tregtisë ilegale: kontrabanda e cigareve që operohej nga Amerika e Veriut në Itali dhe Europë , nëpërmjet Shqipërisë.

Kontrabandistët kishin lidhje me mafian italiane, konkretisht, Nuova Camorra Organizzata.

Regjimi i kohës krijoi një zonë të lirë për ardhjen e këtij produkti. Sipas studiuesit Kemp , duke marrë nëntë dollarë për çdo paketë, ajo qeveri do të kishte marrë rreth 35 milionë dollarë, midis 1968 dhe 1991.

Në këtë mënyrë, shpjegon studiuesi, Deti Adriatik, i quajtur më parë kufiri blu, u bë një derë drejt Lindjes për grupet kriminale italiane.

Në këmbim, regjimi shqiptar fitoi rrjeta dhe valutë, kështu u hap Rruga Ballkanike e këtij trafiku. Me kalimin e kohës më shumë se 10 mijë shqiptarë mbërritën në Itali, ky fenomen i diasporës shqiptare përcaktoi se Shqipëria ka një nga ritmet më të larta të emigrimit në botë, më shumë se një milion e gjysmë jetojnë në Evropë.

Remitancat që ata dërgojnë përfaqësojnë afërsisht 12 përqind të PBB-së së atij vendi. Trafikimi i qenieve njerëzore drejt Belgjikës , Francës , Italisë dhe Mbretërisë së Bashkuar filloi të intensifikohej, nëpërmjet rrjeteve që kishin lidhje edhe me tregtinë e heroinës dhe kanabisit .

Mbretëria e Bashkuar pranoi shqiptarët si refugjatë, megjithëse shumë prej tyre ishin shqiptarë të Kosovës të ikur nga lufta.

Në vitin 2000, ata tashmë kontrollonin tregun e kokainës në atë vend. Ndërsa shqiptarët kanë qenë aktivë në trafikun e qenieve njerëzore drejt Italisë që nga vitet 1990 , para se të hynin në tregtinë e drogës, deri në vitin 2020, në burgjet italiane ishin 2300 shqiptarë, thekson Kemp .

Shtrirja e mafias shqiptare në Amerikën e Jugut ishte marrëdhënia e saj me rrjetet italiane të përfshira në trafikun e drogës .

Raportet nga ai vend identifikojnë të paktën pesë organizata të mëdha kriminale.  Siç konstaton hetimi i “Tentacles transnacionale” , operatorët shqiptarë ishin “bashkëpunëtorët e vegjël” të italianëve.

Mafia ‘Ndrangheta’ , e cila është dominuese në rajonin italian të Kalabrisë , i merr të ardhurat nga tregtia e paligjshme e drogës dhe armëve.

Deri në vitin 2007, ajo lëvizi rreth 50 miliardë dollarë, pra 3.5 për qind e PBB- së së atij vendi. Furnizuesit e saj të drogës, dhe veçanërisht kokainës, janë grupe kriminale kolumbiane.

Sipas një raporti të përbashkët nga Zyra e Kombeve të Bashkuara për Drogën dhe Europol , që nga vitet 1990 grupi kriminal italian kalabre kishte marrëdhënie me kartelin Cali .Gazetarja Cecilia Anesi ka vënë në hartë ‘Ndrangheta’ . Sipas kërkimeve, shqiptarët filluan si shoferë të trafikantëve italianë; ata punonin në portet e Amsterdamit dhe Roterdamit , ku merreshin ngarkesat e mëdha të kokainës.

Gjithsesi, gjërat ndryshuan kur shqiptarët e kuptuan se mund të hynin vetë në këtë biznes dhe të kujdeseshin për të gjithë zinxhirin, madje të arrinin direkt tek furnitorët në Amerikën Latine . Konkretisht, Kolumbia dhe Ekuador .

PARAJSA NË EKUADOR

Ky vendim për dërgimin e operatorëve nga Shqipëria erdhi si pasojë e disa faktorëve, të cilët e bënë mjedisin në Ekuador të favorshëm .

Lehtësia e hapjes së kompanive për të eksportuar fruta (veçanërisht banane ) dhe prodhime deti u shfrytëzua nga biznesmenët e parë me kombësi shqiptare.

Kështu bëri shqiptari Arbër Cekaj , i cili filloi të vinte në Ekuador në vitin 2009, me imazhin e një biznesmeni.

Ai përdori rreth njëzet kompani eksportuese të frutave.

Raportet e Drejtorisë Kundër Narkotikëve të Policisë tregojnë rritjen eksponenciale të trafikut të drogës në Evropë .

Vëllimi u rrit tetë herë midis 2015 dhe 2021, sipas raporteve të shikuara nga Vistazo .

Mekanizmi më i përdorur është ndotja e kontejnerëve me fruta.

Kjo metodë ishte më e përsëritura gjatë vitit 2022, sipas një agjenti kundër narkotikëve të intervistuar nga Vistazo .

Skanimi i kontejnerëve do të lejojë zbulimin e kontaminimit në struktura (muret e kontejnerëve) dhe në produkt, i cili përbën 47 për qind të konfiskimeve të përgjithshme të drogës, sipas këtij agjenti.

Në të vërtetë, në fund të vitit 2021 qeveria urdhëroi që portet të kenë sisteme dhe teknologji për skanim.

Aktualisht porti me progresin më të madh është Posorja .

Sipas një zyrtari të lartë, vetëm një proces skanimi teknik, i kryer nga personeli që kalon testet periodike të besimit (poligraf) do të bëjë të mundur adresimin e problemit.

“Prania e trafikantëve shqiptarë në Amerikën Latine ka qenë e lidhur me numrin e vrasjeve dhe vdekjeve të dhunshme të qytetarëve të asaj origjine, të dyshuar si të lidhur me aktivitete të paligjshme”, thuhet në një dokument nga Zyra e Kombeve të Bashkuara kundër Krimit .

Ky fenomen ka filluar të jetë i dukshëm në vend që nga viti 2013. Në këtë periudhë janë vrarë qytetarë nga Ballkani.

Njëri prej tyre po përballej me një hetim për pastrim të mundshëm parash.  Do të kishte të bënte gjithashtu me vdekjen e dhunshme të gazetarit Fausto Valdiviezo, i cili u qëllua në prill të 2013-ës, shkruan më tej media ekuadoriane.

(BalkanWeb)