Man.City shpartallon Leipzig 7-0, kualifikohet për në fazën çerekfinale të Champions League me rezultatin e përgjithshëm 8-1, shifra që nuk lënë vend për koment. Pep Guardiola i falet edhe një herë Erling Haaland, autori i 5 golave, e të mendosh që e mbajti në lojë deri në minutën e 63-të. Me një super Haaland në dispozicion, Man.City pa diskutim janë nga favoritët kryesor për të fituar këtë sezon, në fakt kështu ka qenë prej vitesh, me apo pa Haaland, por në fund “qytetarët” kanë dështuar gjithnjë.
Sfida u zhbllokua në minutën e 22-të ku biondi u tregua i saktë nga pika e bardhë e penalltisë. Dy minuta më pas, Haaland dyfishoi shifrat. Në fundin e pjesës së parë, ishte sërish Haaland që ndoqi mirë aksionin dhe në vijën fatale e dërgoi në rrjetë.
Historia nuk ndryshoi as me fillimin e pjesës së dytë, thjesht ishte Gundogan që prishi zinxhirin e golave duke realizuar të katërtin për City-n në minutën e 49-të. Në të 53-tën, Haaland dërgoi shifrat në 5-0, ndërsa katër minuta më pas realizoi golin e tij të pestë personal dhe të gjashtin për Man.City.
Për fatin e mirë të Leizpig, Guardiola vendosi ta ul në stol Haaland në minutën e 63-të, por në shtesë, ishte De Bruyne që sigloi shifrat përfundimtare në 7-0, rezultat që kënaq Pep Guardiolën:
“Ishte më të vërtetë një paraqitje shumë e mirë, nga minuta e parë deri në fund. Shënuam shumë gola, Haaland ishte fantastik, por jo vetëm ai, të gjithë ishin të shkëlqyer. Haaland është një djalë i jashtëzakonshëm, me shumë talent, potencial dhe me mentalitet fitues, por këtë herë ky ekip di dhe të mbrojë shumë mirë”, u shpreh Pep Guardiola pas ndeshjes.
(BalkanWeb)