Një prift ortodoks rus, i cili kryesoi shërbimin e funeralit për Alexei Navalny, ish liderin e ndjerë të opozitës dhe kundërshtarin më të fortë të presidentit Vladimir Putin, është pezulluar nga detyra.

Lajmi është bërë i ditur nga Dioqeza e Moskës e Kishës Ortodokse Ruse me anë të një deklarate.

Megjithatë nuk është bërë e ditur arsyeja e marrjes së një vendimi të tillë.

Dioqeza njofton se vendimi ndalon priftin Dmitry Safronov të japë bekime, të mbajë kryqin e kishës ose të mbajë veshjen specifike deri në vitin 2027.

“Në përfundim të periudhës së pendesës, do të merret një vendim për mundësinë e shërbimit të tij të mëtejshëm”, tha dioqeza.

Më 26 mars, Safronov mbajti një shërbim përkujtimor ku morën pjesë mijëra persona për Navalny, i cili ishte kritiku më i ashpër i Vladimir Putin brenda Rusisë dhe vdiq në moshën 47-vjeçare në një burg të Arktikut në shkurt.