Një autobus që transportonte emigrantë nga Venezuela, Kolumbia dhe vendet e Amerikës Qendrore u përmbys në Meksikën qendrore, duke vrarë 17 persona, thanë zyrtarët në shtetin Puebla.
Aksidenti ndodhi në një autostradë dje pasdite, ndërsa një autobus me 45 pasagjerë po shkonte drejt veriut, u tha gazetarëve Sekretari i Brendshëm i shtetit Julio Huerta.
“Pesëmbëdhjetë persona vdiqën menjëherë në momentin e aksidentit të trafikut ”, tha ai në një konferencë për shtyp. 15 të tjerë u shtruan në spital, dy prej të cilëve vdiqën më vonë, tha ai. Pesë të tjerë mbeten në gjendje kritike.
Zyrtari nuk tha se sa nga të vdekurit dhe të plagosurit ishin emigrantë dhe agjencia e imigracionit e Meksikës nuk iu përgjigj menjëherë një kërkese për koment.
Emigrantët shpesh marrin rrugë të rrezikshme për të kaluar Meksikën në rrugën e tyre për në kufirin e SHBA. Mediat meksikane raportuan se autobusi u përmbys kur shoferi humbi kontrollin e mjetit.
Javën e kaluar, dhjetëra emigrantë vdiqën në Panama, kur autobusi me të cilin po udhëtonin u përplas në një shkëmb, në aksidentin më të rëndë të emigrantëve në historinë e vendit.
