Duke theksuar se ndihmat nga Jordania mbërritën menjëherë pas tërmeteve, ministri i Jashtëm turk falënderoi Jordaninë dhe popullin e saj për solidaritetin dhe mbështetjen e fortë.
Në një konferencë të përbashkët për shtyp me Ministrin e Jashtëm të Jordanisë Ayman Safadi në Ankara, Mevlüt Çavuşoğlu tha se mbështetja nga Jordania erdhi menjëherë pas tërmeteve të dyfishta të javës së kaluar, të cilët morën jetën mijëra njerëzve.
“Ata kanë dërguar ekipin e kërkim-shpëtimit prej 75 personash në vendin tonë dhe kanë kontribuar shumë. Faleminderit shumë për këtë. Ata dërguan edhe një ekip mjekësor prej 30 personash me këtë ekip kërkim-shpëtimi”, tha ministri turk.
Çavuşoğlu tha gjithashtu se ambasadori i Turqisë Devrim Ozturk, përfaqësuesi i Ministrisë së Punëve të Jashtme në Hatay, së bashku me dy shtetas jordanezë janë ende nën rrënoja.
Ndërkohë, Jordania ka ngritur një spital fushor në Kahramanmaras jugor me 108 personel, sipas Çavuşoğlu teksa njoftoi vizitën e Safadi në Kahramanmaras.
Duke vënë në dukje se Jordania dërgoi më shumë se 10 tonë ndihma humanitare në Turqi, Çavuşoğlu më tej vuri në dukje se Komisioneri i Lartë i OKB-së për Refugjatët ka ndarë avionë jordanianë mallrash për dërgimin e tendave.
Nga ana e tij, Safadi i Jordanisë theksoi se vendi i tij do të qëndrojë gjithmonë në solidaritet me Turqinë.
“Ne gjithmonë kemi nevojë për njëri-tjetrin në kohë të vështira dhe duhet të ngremë njëri-tjetrin. Ne i dimë shumë mirë pasojat e një fatkeqësie të madhe. Prandaj, ne do të jemi së bashku me ju dhe do t’i vëmë të gjitha burimet tona në dispozicionin tuaj,” u zotua ai.
Duke thënë se Jordania është e gatshme të japë gjithçka që mundet, ai tha se lidhjet e dy vendeve janë historike.
Lëkundjet me magnitudë 7.8 dhe 7.6 ballë më 6 shkurt ishin të përqendruara në Kahramanmaras dhe goditën 10 provinca të tjera-Hatay, Gaziantep, Adiyaman, Malatya, Adana, Diyarbakir, Kilis, Osmaniye, Sanliurfa dhe Elazig. Më shumë se 13 milionë njerëz janë prekur nga tërmetet shkatërruese.
Disa vende të rajonit, përfshirë Sirinë dhe Libanin, gjithashtu ndjenë lëkundjet e forta që goditën Turqinë në më pak se 10 orë.
Më vete, ministri i Jashtëm turk Çavuşoğlu zhvilloi një bisedë telefonike me homologun e tij nga Bangladeshi AK Abdul Momen dhe diskutoi situatën dhe ndihmën në provincat e goditura nga tërmeti.
