Vendet demokratike në mbarë botën duhet ta detyrojnë Rusinë t’i paguajë Ukrainës dëmshpërblimet e luftës dhe të ndërpresin të gjitha lidhjet financiare dhe ekonomike me Moskën, tha ministrja polake e klimës, Anna Moskwa.
“Ne duhet të kompensojmë Ukrainën nga Federata Ruse sa më shumë që të jetë e mundur,” tha Moskwa në një konferencë në kryeqytetin e Kroacisë, Zagreb.
“Duhet të jetë kompensim i denjë për gjithçka, për energjinë, për infrastrukturën energjetike, për çdo qenie njerëzore, për mjedisin, për çfarëdo që është shkatërruar dhe prekur”, shtoi ajo.
Takimi i Partneritetit për Energjinë Transatlantike dhe Bashkëpunimin Klimatik (P-TECC) mblodhi zyrtarë qeveritarë dhe investitorë privatë nga Shtetet e Bashkuara dhe Evropa për të diskutuar se si të ndihmonin Ukrainën të rindërtojë rrjetin e saj të energjisë dhe të kalojë në energji të pastër.
Pas pengesave të shumta në fushën e betejës dhe zvogëlimit të operacionit të trupave të saj në lindje dhe jug të Ukrainës, Rusia në tetor filloi të bombardojë infrastrukturën energjetike të vendit, duke lënë miliona njerëz pa energji dhe ngrohje për ditë të tëra.
Temperatura në muajt e dimrit shpesh qëndron nën zero në pjesën më të madhe të Ukrainës .
Gjatë këtyre sulmeve, rreth 50% e të gjithë sistemit energjetik ishte goditur, por Ukraina ka arritur të rivendosë furnizimin me energji elektrike për të gjithë konsumatorët në vend, tha ministri ukrainas i Energjisë, German Galushchenko .
Sekretarja amerikane e Energjisë, Jennifer Granholm tha se pushtimi rus ka bashkuar botën e lirë në mbështetjen e Ukrainës dhe stabilizimin e sistemit energjetik global, dhe gjithashtu ka përshpejtuar lëvizjen drejt energjisë së pastër që mund t’i bëjë vendet të vetë-mjaftueshme me energjinë.
“Energjia e pastër do të lejojë që ky rajon dhe pjesa tjetër e botës të diversifikohen nga energjia ruse, është e prodhuar në shtëpi dhe e sigurt,” tha Granholm, duke shtuar se transformimi duhet të udhëhiqet nga sektori privat dhe të mundësohet nga qeveritë.
Korporata Financiare e Zhvillimit Ndërkombëtar të SHBA-së (DFC) ka premtuar tashmë 1 miliard dollarë për Ukrainën, tha Jake Levine, shefi i klimës në DFC.
“Ne besojmë se mund ta mbështesim Ukrainën me 1 miliard dollarë para private,” tha Levine.
Moskwa tha se shtetet demokratike duhet të mësojnë një mësim nga lufta e Rusisë në Ukrainë në 2014, pas së cilës ata vazhduan “biznesin si zakonisht” me Federatën Ruse.
“Ajo që na duhet është të ndalojmë biznesin me Federatën Ruse… nëse nuk duam që Letonia, Estonia, Polonia, Lituania apo ndonjë vend tjetër evropian të sulmohen siç ishte Ukraina tashmë dy herë,” tha ajo.
