Nga ish-luftëtari i UÇK, Ismet Sylejmani
Në dokumentarin e datës 19.02.2023, Rrugëtimi i Kosovës drejt pavarësisë të Radio Televizionit të Kosovës, në kohëzgjatje prej 1:29:55 min, asnjëherë nuk u përmend Lëvizja Popullore e Kosovës-LPK dhe Udhëheqësit e saj Heronj e të gjallë, as nga moderatori Korab Lecaj, dhe as nga të ftuarit në studio Prof. Dr. Ibrahim Gashi, znj. Kaçusha Jashari dhe prof. Dr. Begzat Baliu!
Me rastin e 15-vjetorit të Pavarësisë së Kosovës, shtëpia televizive shtetërore e Kosovës – RTK, një orë e gjysmë të emisionit rrugëtimi i Kosovës drejt pavarësisë, asnjëherë nuk përmendet Lëvizja Popullore e Kosovës, themeluesja e Ushtrisë Çlirimtare të Kosovës!
UÇK përmendet nja dy tri herë dhe jo me rrol vendimtar e krucial, dhe jo ashtu sikur ka qenë në fakt.
Ngjashëm përmendet sipërfaqësisht edhe Adem Demaçi e Hashim Thaçi!
Asnjëherë nuk përmenden me emra të pavdekshmit e mëdhenj, vizionarët e shquar të Atdheut, Heronjtë e Kombit Metush Krasniqi, Rexhep Malaj, Kadri Zeka, Jusuf Gërvalla, Afrim Zhitia, Fadil Vata e të mos e përmendim faktin se asnjë i gjallë nga udhëheqësit nuk u përmend.
Nuk u përmend fare kundërshtimi i deputetit të popullit në Kuvendin e Prizrenit të vitit 1945, Tribunit të Kombit Ramiz Cernica! Demonstrata e vitit 1968 u përmend sipërfaqësisht, e nuk u përmendën fare, as demonstratat e vitit 1981 të drejtuara nga Hydajet Hyseni e drejtues tjerë edhe nga studentët, nuk u përmendën as demonstratat në diasporë të drejtuara nga Kadri Zeka në fillim dhe pas vrasjes së Tij me Vëllezërit Gërvalla, të organizuara nga Lëvizja…!
Nuk u u përmend barrikadimi dhe rënia heroike në Kodrën e Trimave në Prishtinë të Heronjve të Kombit Rexhep Malaj e Nuhi Berisha! Nuk u përmendën as demonstratat e vitit 1989-1990 në Prishtinë dhe në gjithë Kosovën dhe rënia heroike e Heronjve të Kombit Afrim Zhitia dhe Fahri Fazliu në Breg të Diellit në Prishtinë!
Nuk u përmenden fare gjyqet politike të anëtarëve të organizatave ilegale politiko-patriotike dhe të studentëve e të rinisë shqiptare në përgjithësi dhe jehona e tyre në popull!
Nuk u përmend numri i madh i të burgosurve politik dhe vitet e shumta të dënimeve që i morën nga gjykatat antipopullore e antishqiptare, të cilat kalojnë mbi 6 shekuj burg!
Nuk u përmend fare roli i madh e i padiskutueshëm i Shqipërisë Nënë dhe i Udhëheqësit të saj Enver Hoxha, kontribut ky kolosal në rrugëtimin e Kosovës drejt pavarësisë!
nuk u përmend roli i madh në rrugëtimin e Kosovës drejt pavarësisë të RTSH e të Radio Tiranës, Radio Kukësit e të literaturës dhe shtypit nga Shqipëria!
Nuk u përmend ndikimi i fuqishëm i shtypit dhe literaturës ilegale në Kosovë e Visë, dhe në diasporë, në rrugëtimin e Kosovës drejt pavarësisë!
nuk u përmend gazeta “Liria”, “Zëri i Kosovës”, “Rruga e Lirisë”, sikur nuk u përmenden as traktet e komunikatat e ndryshme të LPK-së!
Nuk mund të shkruhet historia e re e Kosovës së lirë e të pavarur, pa dhe kundër LPK-së!
të gjithë duhet ta dinë se LPK është nëna jo vetëm e UÇK-së, por edhe e UÇPMB-së dhe e uçkombetare!
Pa LPK-në dhe udhëheqësit e saj, nuk duhet por edhe nuk është e mundur të shkruhet historia e re e Kosovës së Lirë, të Pavarur dhe Demokratike!
Prandaj ky emision jo vetëm nuk është i përkryer, por edhe është me shumë defekte e të meta, i cili lutem të mos jetë tendencioz e i ndikuar nga kundërshtarët politik të saj, të cilët fatkeqësisht nuk janë të paktë!
Edhe televizionet private nuk duhet të bëjnë gabime të tilla, kurse RTK në asnjë mënyrë nuk duhet!