SHBA-Disa dhjetëra mijëra persona kanë marrë pjesë në ceremoninë mortore të agjentit të policisë së New York, Rafael Ramos, një nga dy policët që u ekzekutuan një javë më parë.
Zv.presidenti amerikan Joe Biden vlerësoi “departamentin e policisë më të mirë në botë” në këtë ceremoni, ku merrnin pjesë forca policore nga mbarë Shtetet e Bashkuara dhe Kanadaja.
Turma të mëdha policësh parakaluan për në varrezat e New York, të shoqëruar edhe me një grup helikopterësh që fluturuan në shenjë respekti për viktimën.
Agjenti Ramos dhe kolegu i tij Wenjian Liu u qëlluan për vdekje me armë zjarri pas javësh të tëra protestash ndaj vrasjes së të rinjve me ngjyrë nga policia.
Agjentët e policisë të pranishëm në këtë funeral shpërfillën sërish kryetarin e Bashkisë së New York, Bill de Blasio, që ishte shfaqur për të mbështetur disa nga protestuesit.
Ndërkohë, detajet e ceremonisë mortore të oficerit Liu nuk janë publikuar ende. Autoritetet deklarojnë se ai do të mbahet kur të afërmit e tij të mbërrijnë nga Kina.
Duke e cilësuar oficerin Ramos një “hero”, komisioneri i policisë njujorkeze, Bill Bratton njoftoi se i kishte graduar të dy agjentët në detektivë të klasit të parë, pas vdekjes.
Edhe guvernatori i New York, Andrew Cuomo bëri homazhet e tij për të ndjerin, si dhe i shprehu ngushëllimet e tij gjithë departamentit të policisë për këtë humbje.
(d.d/BalkanWeb)
