Një shtetas britanik u shpëtua pasi u bllokua për pesë ditë në një pus pesë metra të thellë në ishullin turistik Bali të Indonezisë, njoftoi një zyrtar.
“Tre shpëtimtarë përdorën një shkallë për të nxjerrë 29-vjeçarin nga pusi në rrethin Badung”, deklaroi Gusti Wijayanti, një zëdhënëse e agjencisë së kërkimit dhe shpëtimit të Bali.
Gusti theksoi se sipas informacioneve, 29-vjeçari u bllokua brenda pusit për pesë ditë, duke shtuar se ai u plagos, por ndodhet i vetëdijshëm në spital.
“Vendasit thanë se ai ra në pus pasi u ndoq nga një qen”, theksoi ajo.
“Thirrjet e tij për ndihmë u dëgjuan nga një banor, i cili kërkonte bar për të ushqyer bagëtitë e tij”, njoftoi portali i lajmeve Detik.com.
Nuk ishte e qartë nëse viktima e aksidentit është turist apo banor.