Kreu i Partisë së Lirisë, Ilir Meta iu është bashkuar mesazheve për 1-vjetorin e luftës në Ukrainë, duke u solidarizuar me këtë shtet që po përjeton agresionin rus.

Në një reagim në Facebook, Meta thekson se ky popull ka qenë frymëzim për botën, ndërsa ka publikuar dhe një foto me ambasadorin ukrainas në Tiranë.

MESAZHI I METËS
Si sot 1 vit më parë, Ukraina u zgjua nën tmerrin e agresionit të egër rus, e që prej asaj dite, populli ukrainas është kthyer në frymëzim për mbarë botën, me rezistencën e tij heroike për liri, në mbrojtje të atdheut, lirisë dhe demokracisë brenda kufijve të sovranitetit shtetëror. Angazhimi i hershëm ndërkombëtar nga OKB, NATO, BE, si dhe dedikimi i SHBA-ve dhe Mbretërisë së Bashkuar, në këto 12 muaj ka dëshmuar qartazi se uniteti i demokracive perëndimore është efektiv për mbrojtjen e Ukrainës nga ky pushtim ilegjitim dhe Ukraina do të qëndrojë e lirë dhe sovrane. Partia e Lirisë qëndron në solidaritet dhe mbështje të palëkundur për popullin Ukrainas deri në rivendosjen e paqes dhe garantimin e sovranitetit shtetëror.

(BalkanWeb)