Qeveria e Norvegjisë akordon afërsisht 150 milionë NOK (15.1 milionë dollarë) për Misionin e Ndihmës Ushtarake të Bashkimit Evropian në mbështetje të Ukrainës (EUMAM Ukraine).
“Ukraina varet nga mbështetja e vendeve të tjera, për të marrë armë dhe materiale të mjaftueshme për t’i bërë ballë luftës ruse. Norvegjia ka ofruar mbështetje të konsiderueshme dhe do të vazhdojë të kontribuojë me donacione të materialit ushtarak. Është e rëndësishme për sigurinë norvegjeze dhe evropiane që Rusia të mos e fitojë luftën e saj kundër Ukrainës. Forcat ukrainase po luftojnë një betejë të rëndësishme për demokraci dhe drejtësi”, tha ministri i Mbrojtjes Bjørn Arild Gram.
Norvegjia synon të kontribuojë duke mbështetur buxhetin operativ të misionit të trajnimit me rreth 150 milionë NOK përmes Fondit Evropian të Paqes (EPF).
Për më tepër, Norvegjia po financon pjesë të një donacioni estonez të një spitali në Ukrainë, si dhe po dhuron pesë autobusë të ambulancave ushtarake.
Më 14 tetor, Këshilli i Bashkimit Evropian njoftoi zyrtarisht për nisjen e Misionit të Ndihmës Ushtarake të Bashkimit Evropian në mbështetje të Ukrainës (EUMAM Ukraine) për të vazhduar mbështetjen kundër luftës së vazhdueshme ruse të agresionit.
EUMAM Ukraine ka një mandat joekzekutiv për të ofruar trajnime individuale, kolektive dhe të specializuara për deri në 15,000 personel të Forcave të Armatosura të Ukrainës në shumë vendndodhje në territorin e shteteve anëtare të BE-së.
