Duket se Paul Pogba ka prekur fundin e karrierës së tij. Nga një futbollist 100 milionë euro, sot ai nuk mund të luajë futboll profesionist dhe mund ta mbyllë karrierën në mënyrën pa lavdi. Prokuroria Kombëtare Anti-Doping në Itali ka kërkuar pezullim prej 4 vitesh për Paul Pogba.
Pra, asnjë marrëveshje nuk është arritur, siç ishte përfolur ditët e fundit, për francezin e Juventusit, i cili rezultoi pozitiv me testosteron sintetik në testin e kryer nga laboratori antidoping në Romë, pas ndeshjes Udinese-Juventus të luajtur më 20 gusht.
I pezulluar, si masë paraprake më 12 shtator, mesfushori bardhezi gjithashtu rezultoi pozitiv në kundër-analizën, i quajtur ndryshe testi B, rezultatet e të cilit u morën më 6 tetor. Kërkesa për pezullim 4-vjeçar korrespondon me sanksionin e parashikuar për doping, nëse nuk ka marrëveshje për pranimin e fajësisë.
Me sa duket, lojtari ka refuzuar pranimin e fajësisë dhe marrëveshjen përkatëse, në bazë të cilës do të qëndronte 2 vite larg fushave të blerta. Kësisoji, Pogba do të shkojë në gjyq, përpara Gjykatës Kombëtare Anti-Doping.
Juventus po pret vetëm fundin e gjyqit për të ndëprerë gjithçka më francezin. Nëse Pogba dënohet për 4 vjet, në përfundim të pezullimit do të ishte 35 vjeç dhe vështirë të ishte në gjendje të luante në nivele të larta.
(BalkanWeb)
