Kombëtarja e Shqipërisë do të zhvillojë në fillim të qershorit një fazë përgatitore 10 ditore në Zvicër ku do të luajë edhe ndeshjen miqësore me Ukrainën. Dy federatat, shqiptarja dhe ajo e Kosovës kishin rënën dakord për një tjetër miqësore, por zhvillimet e fundit kanë ndërlikuar situatën dhe duket se kjo do të anulohet.

Gjithsesi sot në Tiranë ka mbërritur trajneri i kombëtares kuqezi, Christian Panucci, i cili ka zhvilluar një mbledhje me kolegët e tij kuqezinj të kombëtareve të moshave dhe me drejtues të federatës. Më pas në intervistë për gazetarët ai ka deklaruar:

“Sot zhvilluam një mbledhje me të gjithë trajnerët e kombëtareve të moshave. Federata Shqiptare e Futbollit po investon për të rritur sa më shumë talente nga Shqipëria. Shpresojmë që të lindin sa më shumë lojtarë me cilësi, që në të ardhmen t’i shërbejnë përfaqësueses. E rëndësishme është që puna dhe bashkëpunimi me klubet ka nisur.

Po punohet për të plotësuar grupin, sepse humbja në miqësoren me Norvegjinë na ka bërë të kuptojmë se ka diçka që nuk shkon, duhet ndryshuar. Fizikisht lojtarët nuk do të vijnë në maksimumin e mundshëm, megjithatë kombëtarja është kombëtare dhe nuk ka shumë ndeshje miqësore, kështu që në 10 ditët e grumbullimit në Zvicër duhet të punojmë me seriozitet, për të vijuar me përgatitjet në kuadër të Ligës së Kombeve dhe eliminatoreve të Europianit.

I kuptoj futbollistët, që kanë zhvilluar një sezon të lodhshëm, duke dhënë gjithçka, megjithatë duhet të japin edhe diçka për kombëtaren në mbyllje të sezonit, sespe me skuadrën përfaqësuese nuk bëhet shaka. Grupin po e formojmë. Pas humbjes me Norvegjinë e kuptopva që diçka duhet ta ndryshojmë, por me fokusin kryesor te mënyra e lojës. Në Zvicër do të provojmë disa aspekte të rëndësishme.

Guri po shkëlqen me Kukësin? Ai ia ka bërë vetë vendin vetes në kombëtare, nëpërmjet paraqitjeve dhe golave që po shënon. Duhet të vazhdojë të punojë dhe shpresojmë të jetë pjesë e grupit. Sidoqoftë, gjithçka varet nga ai. Unë ftoj gjthnjë më të mirët.

Marco Cassetti, ndihmësi im i ri? Besoj se ka mbi 300 ndeshje në Seria A. Kemi qenë shokë skuadre te Roma. Kam një marrëdhënie mjaft të mirë me të, mund të më ndihmojë sidomos me mbrojtësit. Puna e tij do të ketë shumë vlera në përmirësimin e repartit difensiv”.

(e.k/BalkanWeb)