Një sulm kibernetik ka shkaktuar një incident të pazakontë në disa supermarkete në Suedi, ku temperaturat në frigoriferët dhe ngrirësit e dyqaneve u rritën ndjeshëm gjatë natës së të dielës.

Sipas raportimeve, sistemet e ftohjes u vunë në shënjestër të një sulmi kibernetik, duke bërë që në disa pajisje temperatura të arrinte deri në 50 gradë Celsius.

Një supermarket suedez njoftoi të hënën në rrjetet sociale se frigoriferët dhe ngrirësit e tij ishin vendosur në këtë temperaturë, duke paralajmëruar për incidentin.

Rrjeti i supermarketeve ICA konfirmoi për agjencinë Reuters se një numër i kufizuar dyqanesh ishte prekur nga sulmi.

“Jemi të vetëdijshëm se një numër i kufizuar dyqanesh u prekën gjatë natës nga një incident që synonte sistemet e ftohjes dhe ngrirjes”, deklaroi një zëdhënës i kompanisë.

Ndërkohë, edhe rrjeti tjetër i madh i supermarketeve, Coop, konfirmoi për gazetën suedeze Aftonbladet se gjashtë prej dyqaneve të tij ishin prekur nga incidenti.

Ngjarja ka ngritur shqetësime për sigurinë e sistemeve teknologjike që kontrollojnë pajisjet frigoriferike dhe për rrezikun e dëmtimit të produkteve ushqimore.

Raste të ngjashme janë raportuar edhe në Francë gjatë muajit tetor. Sipas policisë franceze, hakerat arritën të merrnin kontrollin e sistemeve frigoriferike në qindra supermarkete, në një sulm kibernetik në shkallë të gjerë.

Incidenti shkaktoi dëmtimin e sasive të mëdha të ushqimeve dhe, sipas raportimeve, edhe shpërthimin e disa zjarreve.

Sulmet e fundit kanë rikthyer vëmendjen te cenueshmëria e sistemeve të kontrollit industrial dhe rreziqet që sulmet kibernetike mund të shkaktojnë edhe në funksionimin e shërbimeve të përditshme.