Partia Demokratike ka kërkuar anulimin e menjëhershëm të kontratës koncesionare 35-vjeçare për aksin Milot–Balldren. Nënkryetari i PD, Belind Këlliçi, ngriti akuza të forta ndaj qeverisë dhe SPAK-ut, duke pretenduar se në konsorciumin fitues bën pjesë një kompani e lidhur me persona nën hetim për pastrim parash.
Sipas Këlliçit, kontrata me një vlerë fillestare prej 365 milionë eurosh dhe me një fitim të garantuar që, sipas tij, mund të arrijë në rreth 1 miliard euro, i është dhënë një konsorciumi ku kryeson kompania e Pëllumb Salillarit, ndërsa pjesë e tij është edhe kompania “Erald-G”, në pronësi të Gëzim Ismailit.
Nënkryetari i PD-së deklaroi se Ismaili figuron në dosjen hetimore të SPAK-ut si person nën hetim në kuadër të çështjes së grupit të njohur si “Aruba”, që dyshohet për trafik ndërkombëtar droge dhe pastrim parash. Këlliçi tha se, sipas dosjes së SPAK-ut, Gëzim Ismaili është kunati i Luçiano Koçekut, një prej të dyshuarve në këtë grup, dhe pretendoi se kompania e tij është përdorur si fasadë për investime që synonin legalizimin e parave me origjinë kriminale.
Ai kujtoi se më 10 qershor 2026, GJKKO caktoi masa sigurimi për 19 persona në kuadër të hetimit për grupin “Aruba”, mes të cilëve, sipas tij, edhe pronari i kompanisë “Erald-G”. Sipas Këlliçit, pavarësisht hetimeve, kompania ka vijuar të përfitojë kontrata publike. Nënkryetari i PD-së ngriti pikëpyetje mbi faktin se si një kompani, që sipas tij lidhet me një hetim të SPAK-ut, mund të jetë pjesë e konsorciumit fitues të një prej projekteve më të mëdha infrastrukturore në vend.
Partia Demokratike kërkoi anulimin e procedurës koncesionare, vendosjen nën sekuestro të kompanisë në fjalë dhe hetimin e të gjitha tenderëve të përfituar prej saj ndër vite. Në fund të deklaratës, Këlliçi hodhi akuza politike ndaj kryeministrit Edi Rama, duke kërkuar largimin e tij nga pushteti dhe krijimin e një qeverie kujdestare, duke e lidhur këtë kërkesë me protestat e zhvilluara në Tiranë. Deri në këtë moment nuk ka një reagim zyrtar nga qeveria, kompania “Erald-G” apo SPAK lidhur me pretendimet e ngritura nga Partia Demokratike.
DEKLARATA
Të nderuar qytetarë,
Kontrata konçesionare 35 vjeçare për aksin Milot-Balldren, me vlerë 365 milionë euro, kosto fillestare, e theksojmë fillestare, pasi siç kemi parë kaq herë, kostot fryhen gjatë rrugës, dhe me një fitim të garantuar rreth 1 miliardë euro, i është dorëzuar një konsorciumi biznesesh, ku prin kompania e Pëllumb Salillarit dhe ku mes kompanive të tjera bën pjesë dhe kompania ‘Erald-G’, nën pronësinë e Gëzim Ismailit, një prej kumbarëve të qeverisë në takimin famëzi të Arubës.
Ky individ, sipas dosjes hetimore të SPAK, po hetohet si një prej lavatriçeve të pastrimit të parave të një prej klaneve të trafikut të kokainës nga Amerika Latine drejt Europës.
Në dosjen e SPAK, rezulton se Ismaili është kunati i Luçiano Koçekut, njërit prej eksponentëve të grupit ‘Aruba’, dhe ka shërbyer si fasadë përmes së cilës paratë e krimit janë integruar në projekte ndërtimore, përfshirë legalizimin e miliona eurove.
Faktet flasin vetë. Më 10 qershor 2026, Gjykata e Posaçme caktoi masa sigurimi për 19 persona të të ashtuquajturit ‘Grupi i Aruba-s’, i dyshuar për trafik narkotikësh dhe pastrim parash përmes investimeve në Shqipëri. Mes tyre është edhe Gëzim Ismaili, pronari i ‘Erald-G’, ortaku i të cilit është në arrest shtëpie për ‘pastrim të produkteve të veprës penale’ dhe ‘grup i strukturuar kriminal’.
Por ajo që SPAK vijon të fshehë është fakti se kjo kompani është shpallur fituese në të paktën 217 procedura tenderuese dhe vetëm në 6 vitet e fundit, ka përfituar mbi 6 milionë euro para nga buxheti i shtetit.
Kjo kompani jo vetëm që nuk është vënë nën sekuestro nga SPAK, por gjendet sot në konsorciumin fitues të tenderit më të shtrenjtë në historinë e infrastrukturës rrugore shqiptare, procedurë që ka nisur që në gusht 2025, nën drejtimin e Belinda Ballukut, tashmë e akuzuar për shkelje të barazisë në tendera dhe korrupsion.
Pyetja që lind është fare e thjeshtë.
Si është e mundur që nën hundën dhe sytë e SPAK, gjatë kohës që këto kompani të lidhura me krimin e organizuar janë nën hetim nga SPAK, përfitojnë kontrata me vlera qindra milionë euro nga fondet publike?!
Partia Demokratike kërkon ANULLIMIN e menjëhershëm të kësaj procedure, pasi paratë e shqiptarëve nuk mund të përdoren për të pastruar paratë e drogës dhe krimit të organizuar, nga Ekuadori deri në Aruba.
I bëjmë thirrje SPAK të vërë nën sekuestro të menjëhershme këtë kompani si dhe të hetojë qindra tendera të përfituar prej saj, që nga dita e ardhjes së ‘Rilindjes’ në pushtet.
Sa për Edi Ramën; koha jote ka mbaruar.
Ti je sot i kapur mat duke nxjerrë paratë që u ke vjedhur qytetarëve më të varfër në Europë jashtë Shqipërie përmes familjarëve të tu, dhe nuk do të vazhdosh të përdorësh paratë e shqiptarëve, për të pastruar paratë e karteleve më famëkeqe në botë.
As drejtësia që ti kontrollon dhe as mediat e paguara prej teje, nuk të dalin dot më për zot.
Fati yt tashmë tashmë është shkruar.
Ti, së bashku me ortakët e tu të krimit të organizuar duhet të largoheni dhe t’i hapni rrugën një qeverie kujdestare, siç kërkon edhe protesta qytetare, që prej 50 ditësh ka mbushur Bulevardin kryesor të Tiranës.
Vetëm dorëheqja dhe largimi i Edi Ramës i kthen investimet publike në duart e qytetarëve dhe Shqipërinë në rrugën drejt integrimit europian, me standarde e reforma të vërteta.
