TIRANË
Kryeministri Edi Rama ka reaguar pas akuzave nga Partia Demokratike për paketën anti-KÇK të miratuar nga qeveria javën e kaluar.
Rama shkruan në “Twitter” se nuk ka asnjë surprizë dhe se as kanë parë gjë akoma e as nuk kemi dëgjuar gjë akoma nga goja e tyre. Sipas Ramës, PD krimin e ka mjet politik kundër qeverisë.
“PD vë në dyshim kushtetutshmërinë e paketës antiKÇK? Asnjë surprizë! As kanë parë gjë akoma po as kemi dëgjuar gjë akoma nga goja e tyre! Krimin e kanë mjet politik kundër qeverisë, por s’e kanë pasur kurrë në shënjestrën e tyre! Përkundrazi! E kanë ushqyer e janë ushqyer prej tij?”, shkruan Rama
PD deklaroi sot se përtej propagandës kryeministri nuk ka për të bërë asgjë, sepse pushteti i Edi Ramës varet nga krimi i organizuar, nga trafikantët e dënuar për trafik ndërkombëtar droge, nga vrasësit dhe kriminelët më të rrezikshëm të vendit, që blejnë dhe sigurojnë vota për pushtetin e tij.
(BalkanWeb)
