Studentja 23-vjeçare Ilaria Lamera u bë simbol në luftën kundër qirave të shtrenjta për studentët në Milano nga e marta e 2 majit. Me origjinë nga Bergamo, studentja e re studion për Inxhinieri Mjedisi në Politeknikun e Milanos. Ilaria është në vitin e katërt, por vitet e mëparshme, për shkak të pandemisë, ajo i ndiqte mësimet kryesisht online. Por, tani që vendosi të transferohej në Milano për të vazhduar studimet në prezencë fizike, u gjend përballë një pengese të pakapërcyeshme, nuk mund të gjente shtëpi me qira me një çmim të arsyeshëm, pasi i kërkonin 600 euro në muaj për një dhomë!
Qiratë e shtrenjta nuk janë të panjohura për Milanon, por 23-vjeçarja Ilaria duket e vendosur të bëjë “betejën” e saj për të ndërgjegjësuar autoritetet e metropolit italian dhe për të zgjidhur problemin e strehimit për mijëra studentë. Të martën, më 2 maj, Ilaria ngriti një tendë jashtë Universitetit Politeknik të Milanos në Piazza Leonardo Da Vinci dhe deklaroi se deri të dielën e 7 majit do të flinte brenda çadrës në shenjë proteste ndaj jetës së vështirë të studentëve në qytet.
Në krah të Ilaria Lamerës që në momentin e parë kanë qenë shumë studentë, ndërsa kalimtarët që kalojnë pranë sheshit flasin me të dhe lexojnë shenjën e protestës “fund qirave të paqëndrueshme” që ajo mban në duar dhe disa prej tyre ofrojnë studentes ushqim dhe kafe. Organizata studentore e Politeknikut të Milanos “La Terna Sinistrorsa” mbështet vajzën 23-vjeçare dhe lëshoi një deklaratë lidhur me luftën e saj kundër qirave të shtrenjta për studentët. “Për vite me radhë, kostot e qirasë në Milano kanë qenë të papërballueshme. Të jetosh në Milano do të thotë që duhet të paguash 600 euro (përjashtuar faturat e energjisë elektrike, ujit etj.) për një dhomë të vogël që përshtatet vetëm për një person. Edhe pse situata dihet dhe institucionet janë në dijeni të saj, ende nuk është marrë asnjë masë për ta bërë më të përballueshëm akomodimin në Milano”, thuhet në deklaratë.
Qiratë e paqëndrueshme për studentët në Milano
Protesta e studentes 23-vjeçare nisi fuqishëm mbrëmjen e së martës me organizimin e një takimi të hapur nga studentët e grupit “La Terna Sinistrosra” për qiratë e shtrenjta për studentët në Milano. “Jam pak i dëshpëruar, sepse nuk kam fjetur shumë. U zgjova në orën 5.30 se me dritën nuk flija dot më”, ka shkruar Ilaria në Instagram pas natës së parë në çadër, ndonëse nuk është e vetme, pasi siç ka bërë me dije ndjekësit në rrjetet sociale, natën jashtë çadrës së saj ka qëndruar shoku i saj Luca, që ajo të ndihet e sigurt. Studentja e re ka deklaruar në Instagram se ka shumë studentë që kalojnë nga sheshi për ta uruar për luftën e saj, megjithatë ajo thekson se për momentin nuk është gjetur njeri që të vijë dhe të vendosë çadrën e tyre pranë saj . Ilaria Lamera me origjinë nga Bergamo ka dy mundësi për të
vazhduar studimet në Milano. Ose do të jetojë në shtëpinë e saj me prindërit dhe do të marrë trenin nga Bergamo për në Milano çdo ditë, një udhëtim gjithsej katër orë, ose do të duhet të ketë 600 euro në muaj vetëm për qiranë. Siç tha ajo, pas përfundimit të pandemisë, ajo ka marrë një dhomë me qira me çmimin e mësipërm dhe kontrata e saj skadon në gusht. Atëherë ajo do të duhet të fillojë të kërkojë një shtëpi përsëri, duke e ditur se sa e vështirë është të gjesh strehim me një çmim të arsyeshëm.
