Një qytetar pjesëmarrës në protestën kundër qeverisë dhe politikës së vjetër ka bërë deklarata të ashpra ndaj kryeministrit Edi Rama dhe ish-kryeministrit Sali Berisha, duke kërkuar që drejtësia të veprojë ndaj tyre.

Duke folur për arsyen e pjesëmarrjes në protestë, qytetari tha se ishte kundër Berishës, të cilin e akuzoi për vendime të marra gjatë viteve të qeverisjes, ndërsa kritikoi edhe Edi Ramën për mënyrën e qeverisjes.

“Jam në protestë kundër Berishës, që shiti në Serbi për skrap gjithçka të komunizmit. Ai krijoi emigracionin në 1991”, u shpreh qytetari.

Ai kritikoi edhe kryeministrin Edi Rama, duke e akuzuar se pas marrjes së pushtetit ka vepruar sikur Shqipëria të ishte pronë e tij.

“Edhe Edi Rama, pasi mori besimin e popullit, u ul këmbëkryq dhe copëtoi hartën e Shqipërisë si ta ketë pronën e vet. Ai është një tradhtar i ndyrë”, deklaroi protestuesi.

Qytetari kërkoi gjithashtu ndërhyrjen e drejtësisë, duke shprehur pakënaqësi ndaj SPAK-ut dhe duke pretenduar se Rama dhe Berisha kanë ndarë mes tyre vjedhjet dhe aferat.

“SPAK nuk e di çfarë bën. Qoftë Berisha, qoftë Rama, duhet t’i jepen drejtësisë një orë e më parë”, tha ai.

Në përfundim, protestuesi përdori tone të forta ndaj dy figurave politike, duke deklaruar: “Rama bashkë me Berishën as varr nuk duhet të kenë në Shqipëri për atë që kanë bërë”.

Deklaratat janë qëndrime të qytetarit dhe përbëjnë akuza të tij politike, të cilat nuk paraqiten si fakte të provuara gjyqësisht.