Aktorja Rita Gjeka është emocionuar kur ka treguar momentin më të vështirë në jetë artistike në një rrëfim për News24. Ajo ka treguar për moderatoren Çenkuela Hasa se largimi nga jeta i artistit Bardh Smaja dhe drejtor i Teatrit Migjeni në atë kohë, ka shenjuar në jetën e saj profesionale.

“Momenti që ka lënë shenjë më të madhe te unë është kur mora drejtimin e teatrit. Ne kishim një muaj që më në fund kishim në krye të teatrit një drejtor që e donim të gjithë, është fjala për Bardh Smajën.
Ne po bënin ‘Kandili i Argjendit’ të Martin Camaj dhe në premier dhe prova gjenerale ishte e shoqja e Camaj për të parë shfaqjen por Bardhi ishte në spital, dhe unë kam dalë me telefon në dorë në skenë që ai të merrte emocionet live të punës së tij, ka qenë momenti më dramatik në jetën time në teatër.

Pas vdekjes së tij u thirra me urgjencë në bashki për të marrë drejtimin e teatrit dhe mbaj mend që kryetarja e atëhershme, Voltana Ademi më tha që bëje për Bardhin, për 7 vjet e pak kam qenë nënpunës i autorizuar nuk kam qenë kurrë drejtori. Ka kaluar shumë kohë, nuk dua të jem emocionale por çdo premier në sallë hyn një zog që fluturon dhe na bekon”- tha Gjeka për News24.