Kërkimet janë ende duke vijuar nën rrënojat e pallatit të shembur në Miami të SHBA-ve.
Mediat e huaja shkruajnë se deri më tani 4 persona janë shpallur të vdekur, ndërsa 159 të tjerë janë ende të zhdukur. Familjarë të shumtë janë duke pritur me ankth, ndërsa ekipet e kërkim-shpëtimit thonë se po dëgjojnë zëra njerëzish nën gërmadhat e pallatit.
Ende nuk është e qartë se çfarë saktësisht e shkaktoi shembjen e ndërtesës dhe sa persona ndodheshin brenda në momentin e fatkeqësisë.
Presidenti Joe Biden e ka miratuar shpalljen e gjendjes emergjente në Florida. Me këtë veprim, Agjencia Federale për Menaxhimin e Emergjencave do t’i ndihmojë agjencitë shtetërore të Floridës në përpjekjet për kërkim-shpëtimin.
Gjatë natës, ekipet e shpëtimit përdorën kamera që e gjurmojnë praninë e zërit dhe qen të trajnuar, teksa kërkonin për të mbijetuarit. Madje sipas mediave disa ekipe hapën një tunel nga një parking nëntokësor makinash, në përpjekje për të arritur te njerëzit e ngujuar.
(BalkanWeb)
