Kryeministri i Kosovës Albin Kurti e ka vlerësuar nënshkrimin e memorandumit trilateral mes Kosovës, Shqipërisë dhe Kroacisë në fushën e mbrojtjes si një hap të rëndësishëm.
Ai e ka cilësuar këtë marrëveshje si një avancim të madh për sigurinë dhe paqen në rajon, duke theksuar rëndësinë e bashkëpunimit dhe koordinimit ndërmjet vendeve paqedashëse.
Marrëveshja u nënshkrua sot në Tiranë nga ministri i Mbrojtjes i Kosovës, Ejup Maqedonci, ministri i Mbrojtjes i Shqipërisë, Pirro Vengu, dhe ministri i Mbrojtjes i Kroacisë, Ivan Anušić.
Ky dokument synon forcimin e kapaciteteve mbrojtëse të tre shteteve, rritjen e bashkëpunimit në industrinë e mbrojtjes dhe përmirësimin e ndërveprimit ushtarak përmes trajnimeve dhe stërvitjeve të përbashkëta.
(BalkanWeb)
