Të paktën katër persona kanë humbur jetën dhe më shumë se 45 mijë familje kanë mbetur pa energji elektrike në zonat pranë Tokios, pasi tajfuni Dujuan goditi Japoninë. Sipas autoriteteve japoneze dhe kompanisë së energjisë Tepco, shumica e ndërprerjeve të energjisë janë regjistruar në prefekturën Chiba, në lindje të Tokios, ku janë dëmtuar edhe më shumë se 460 banesa. Katër viktima, gjashtë persona rezultojnë të zhdukur

Agjencia japoneze e Menaxhimit të Zjarrfikësve dhe Fatkeqësive bëri me dije se tre persona kanë vdekur në Chiba, ndërsa një tjetër ka humbur jetën në prefekturën Kanagawa, e cila kufizohet me Tokion. Ndërkohë, ekipet e kërkim-shpëtimit vijojnë operacionet në disa zona, pasi gjashtë persona rezultojnë ende të zhdukur pas rrëshqitjeve të dheut të shkaktuara nga reshjet e dendura.

Agjencia Meteorologjike Japoneze ka ulur shumicën e paralajmërimeve për reshje të rrëmbyeshme dhe rrëshqitje dheu, ndërsa Dujuan po largohet nga brigjet japoneze dhe po zhvendoset drejt verilindjes. Megjithatë, autoritetet vijojnë të përballen me pasojat e motit ekstrem, veçanërisht rrëshqitjet e dheut dhe dëmet e shkaktuara në infrastrukturë. Përpara mbërritjes së tajfunit, më shumë se 1.6 milionë banorë në Tokio dhe zonat përreth u urdhëruan të evakuoheshin për arsye sigurie.

Moti i keq shkaktoi gjithashtu probleme të mëdha në transportin ajror, me më shumë se 275 fluturime të anuluara. Ndërkohë, ekipet e emergjencave vijojnë punën për vlerësimin e dëmeve dhe ndërhyrjen në zonat e prekura nga rrëshqitjet e dheut. Ekipet e Tepco-s po punojnë gjithashtu për rikthimin e energjisë elektrike në prefekturën Chiba.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: