Turqia është tronditur ditën e sotme nga një tjetër tërmet i fortë me magnitudë 4.9 të shkallës rihter. Tërmeti pati epiqendër zonën e Malatyas në Turqi, ndërsa nuk raportohen dëme në njerëz apo në infrastrukturë, përveç panikut te qytetarët.

Referuar zonës ku ra tërmeti, sizmiologu i njohur turk, Prof.Dr. Naci Gorur, u shpreh se duhet bërë kujdes i madh në zonën përreth, pasi mund të ketë lëkundje edhe më të forta.

Sipas tij, bëhet fjalë për një pllakë tektonike, e cila përmes tërmeteve të ngjashme po e shtyn enërgjinë e akumuluar gjithnjë e më në veri duke rrezikuar kështu që në vijim të ketë një lëkundje shumë më të fuqishme.

“Bëhet fjalë për pllakën e Anadollit Lindor dhe siç e dini në këtë zonë kanë ndodhur tërmete shumë të fuqishëm në të shkuarën. Madje një vit më parë ndodhi tërmeti në Elazig, i cili i përket kësaj pllake. Për fat nuk ishte një lëkundje shkatërruese, por kjo nuk do të thotë që në vijim nuk mund të ndodhë një e ngjashme, pasi kjo zonë njihet për tërmete të fuqishëm“, u shpreh ai.